–Táýelsizdik kúni qarsańynda biz qazaqstandyq jankúıerlerge tamasha syı jasaýdy qup kórdik, dep bastady óz áńgimesin Asqar Salyqbaev.
–Bizdiń elde boksqa degen qyzyǵýshylyq pen qurmet erekshe jáne de osy sport túrin serik etken órenderimiz tolaǵaı tabystarǵa qol jetkizgenine kúlli álem jurtshylyǵy kýá. Sol jeńispen órilgen tamasha dástúrdi jalǵastyrý – bizdiń mindetimiz. Kásipqoı rıngti jaǵalap júrgen jalyndy jastarǵa jol ashý maqsatynda Almatyda úlken boks keshin uıymdastyryp otyrmyz. Sol sebepti de 16 jeltoqsanda Balýan Sholaq atyndaǵy sport saraıyna kelińizder. Barlyǵymyz birigip, óz jerlesterimizge barynsha qoldaý kórseteıik. Al aıtýly sharany sizder eń qasıetti ári qasterli mereke – Táýelsizdik kúnine oraı bizdiń jańadan ǵana qurylǵan kompanııamyzdyń qazaqstandyq kórermenderge jasaǵan tartýy dep qabyldańyzdar.
–Siz basqaryp otyrǵan kompanııanyń qurylǵanyna áli bir jylǵa da jetken joq. Desek te sol qysqa ǵana merzim aralyǵynda biraz aýqymdy sharalar ótkizip úlgergen ekensizder...
–Bıylǵy jyldyń jazynda Nur-Sultanda qala kúnine oraı amerıkalyq Top Rank jáne brıtanııalyq MTK Global promoýterlik kompanııalarymen birge keremet boks keshin ótkizdik. Bul jarysty da amerıkalyq ESPN+ telearnasy kórsetti. Sondaı-aq iFL TV ıýtýb jobasy da arqyly bul básekeler álemniń basqa da aımaǵyna keńinen taratyldy. Osynyń barlyǵy Qazaqstannyń kásipqoı boksynyń shartarapqa taralýyna oń yqpal etti. Birqatar bylǵary qolǵap sheberlerimizdiń óz jekpe-jekterin shet memleketterde ótkizýine qolaıly jaǵdaı jasadyq. Deńgeıi joǵary sol dúbirli dodalarǵa qatysý arqyly otandastarymyz álemdik reıtıngtegi jaǵdaılaryn birshama jaqsartty.
–Qazir komandalaryńyzda qansha boksshy bar? Bapkerler quramy qandaı? Jýan judyryqty jigitterdiń esh alańsyz jattyǵýyna qolaıly jaǵdaıdyń jasalyp otyr ma?
–Komandamyzdyń quramynda saıdyń tasyndaı 12 boksshy bar. Olardyń barlyǵynyń da jolyna biz úlken úmitpen qarap otyrmyz. Keleshekte aramyzdan eń beldi nusqalardyń altyn belbeýi úshin talasýǵa qarym-qabileti jetetin sańlaqtardyń shyǵatynyna esh kúmánim joq. Al bapkerler quramyna keletin bolsaq, Saǵatbek Musahanov, Qanat Áltaev, Dastan Sádýaqasov syndy bilikti mamandarǵa arqa súıep otyrmyz. Almatydaǵy ál-Farabı kóshesiniń boıynda zamanýıa talaptaryna saı jabdyqtalǵan jaqsy sport zalymyz bar. Biz búgingi tańda óz jigitterimizdiń esh alańsyz jattyǵyp, ózge elderde ótetin iri jarystarǵa qatysýyna barynsha jaǵdaı jasap otyrmyz.
– Táýelsizdik kúnine oraı Almatyda ótetin boks keshi jaıynda tolyǵyraq málimet berseńiz?
–Almatyda ótetin jarysta eki birdeı altyn belbeý sarapqa salynady. Atap aıtsaq, áli eshkimnen jeńilmegen jeńil salmaqtaǵy qazaqstandyq Vıktor Kotochıgov ózine tıesili WBC International nusqasynyń chempıondyq tájin qorǵap qalý úshin Argentınanyń azýly boksshysy Haver Hose Klaveromen kúsh synasady. Al Sultan Záýirbek WBC Youth World Champion (jastar) nusqasynyń altyn belbeýi úshin talasady. Aıtýly jarysta Mırasáli Sársenov, Eskendir Harsan, Raı Seıitjanov, Abaı Tólesh, Elshat Nyǵmetolla, Nurtas Ájbenov jáne Nurdos Tólebaı syndy otandyq bylǵary qolǵap sheberleri sharshy alańǵa shyǵady. Olardan bólek, Nıgerııa, О́zbekstan, Reseı, Fılıppın, Taıland, Grýzııa jáne Ázirbaıjannan kelgen deńgeıi joǵary boksshylar óner kórsetedi. Sondaı-aq, Alataý baýraıynda aıqasatyndar arasynda О́zbekstannyń maqtanyshy, Rıo Olımpıadasynyń jeńimpazy Fazlıddın Gaıbnazarov ta bar.
–Bizdiń jigitterdi aldaǵy ýaqytta taǵy qandaı dúbirli dodalar kútip tur?
–Kelesi jyly óz elimizde jáne shet memleketterde birneshe dúbirli doda uıymdastyrýdy kózdep otyrmyz. Ýaqyty kelgende ol jaıynda 100 jyldyq tarıhy bar el gazeti – «Egemen Qazaqstanǵa» esh birinshi bolyp aqparat berýge daıynbyz.
–Osy sport túrin serik etken kóptegen daryndy jastarymyzdyń shetelge ketip jatqany jasyryn emes. Olardyń aldy – AQSh pen Kanada, Germanııa men Ulybrıtanııadan baq synap júr. Bázbireýler Reseı men Belarýs elinde nápaqasyn tabýda. Osy oraıda kópshilik Qazaqstanda jatyǵyp júrip kásipqoı bokstyń shyńyraý shyńyna jetý múmkin emes degen ýáj aıtýda. Al sizdiń pikrińiz qandaı?
–Kúni búginge deıin Qazaqstanda kásipqoı boksty damytý strategııasy durys jolǵa qoıylmaı keldi. Qalyptasqan júıe de bolmady. Ony biz moıyndaımyz. Sol sebepti de kópshiliktiń pikiri joǵarydaǵydaı boldy. Qazirgi kezde sol olqylyqtyń ornyn toltyrý úshin Qazaqstannyń naryǵyna endi ǵana engen «MTK Global Kazakhstan» kompanııasy tarapynan kóptegen jumys istelip, qyrýar sharýa atqarylýda. Bizdiń basty maqsatymyz – jalyndap turǵan jastardyń úlken arenalarǵa shyǵýyna dańǵyl jol ashý, otandyq kásipqoı boksty órkendetýge barynsha kúsh salý. Daryndy jáne qarymdy jigitter elimizde óte kóp. Oǵan eshkimniń kúmáni bolmaýǵa tıis. Dáp qazir bizdiń aldymyzda sol jastardy shoqtyǵy bıik juldyzdarǵa aınaldyryp, olardy Gennadıı Golovkınniń deńgeıine jetkizý mindeti tur. Ol úshin shekara asýdyń esh qajeti joq joq. Qazaqstanda júrip-aq, kózdegen maqsatymyzǵa qol jetkize alamyz. Oǵan men de, meniń komandam da kámil senedi.
– Áńgimeńizge raqmet!
