Áýelde respýblıkamyzdyń birqatar aımaqtarynda Konfederasııa kýbogynyń irikteý saıystary ótti. Oǵan 14 oblys pen Nur-Sultan, Almaty jáne Shymkent qalalary qatysty. Olardyń barlyǵy jeke-jeke komanda jasaqtap, jarys jolynda jeńiske jetý úshin baryn saldy. Aralarynan úzdik shyqqandary Alataý baýraıynda bas qosyp, aıtýly jarystyń bas júldesi úshin talasty.
Sporttyq jekpe-jek jáne kúsh qoldanylatyn sport túrleri Konfederasııasy uıymdastyrǵan dúbirli dodanyń sheshýshi saıystary taıaýda Almatydaǵy Balýan Sholak atyndaǵy Mádenıet jáne sport saraıynda ótti. Sol jarysta Almaty qalasynyń sportshylary tamasha óner kórsetti. Olar eki altyn, bir kúmis jáne eki qola medaldi ıelendi. Júldeler sapasy jáne sany jaǵynan bul Konfederasııa kýbogyna qatysýshylar arasyndaǵy eń úzdik kórsetkish. Bárekeldi, Almaty!
Tarqatyp aıtsaq, Almaty qalasynyń qurama komandasy taekvondoshylar men karateshiler saıysynda qarsylas shaq keltirmeı, birinshi oryndy oljalady. Qazaq kúresinen ótken jarystyń fınalynda ǵana utylyp, ekinshi satyǵa taban tiredi. Al erkin kúres pen grek-rım kúresi sheberleri úshinshi oryndy ıelendi.
Bıylǵy jyly Konfederasııa kýbogy jolyndaǵy jarysta Almaty qalasy óte tamasha óner kórsetti. Biz sporttyń bes túrinen de júlde aldyq. Árıne, buny kezdeısoqtyq dep baǵalaýǵa bolmaıdy. Sebebi, Alataý baýraıyndaǵy ásem shaharda osy salany damytyp, odan ári órkendetý úshin kóptegen ıgi sharalar júzege asyrylýda. Biraz jyldan beri Elbasynyń «Rýhanı jańǵyrý» baǵdarlamasy, ózimizdiń «Sporttyq Almaty», «Sport meniń aýlamda» jáne taǵy basqa jobalar boıynsha jumystar nátıjeli júrgizilýde. Osy oraıda, sportshylar qaýymyna barynsha qoldaý kórsetip otyrǵan Almaty qalasynyń ákimi Baqytjan Saǵyntaevqa zor rızashylyǵymyzdy bildiremiz, - deıdi qalalyq Sport basqarmasynyń bastyǵy Rústem Baıseıitov.
