«Tarıhı-mádenı mura obektilerin qorǵaý jáne paıdalaný týraly» zań jobasynyń maqsaty - tarıhı-mádenı mura obektilerin qorǵaý jáne paıdalaný, ǵylymı-qalpyna keltirý jáne arheologııalyq qyzmet salasyndaǵy qatynastardy keshendi retteýdiń tıimdi quqyqtyq negizin qalyptastyrý.
Zań jobasy tarıhı-mádenı mura obektilerin qorǵaý, zertteý, saqtaý, paıdalaný jáne keńinen tanymal etý salasyndaǵy qoǵamdyq qatynastardy memlekettik retteý júıesin qurýdy, tarıh jáne mádenıet obektilerin anyqtaý, esepke alý, tarıhı-mádenı saraptama ótkizýdi kózdeıdi.
«Qazaqstan Respýblıkasynyń keıbir zańnamalyq aktilerine tarıhı-mádenı mura máseleleri boıynsha ózgerister men tolyqtyrý engizý týraly» zań jobasy tarıhı-mádenı mura obektilerin qorǵaý jáne paıdalaný salasyndaǵy zańnamany jetildirýdi kózdeıdi.
Qujat birqatar zańnamalyq aktige ózgerister men tolyqtyrý engizedi.
Komıtet tóraǵasy Murat Baqtııaruly Túrkistan oblysy men syrtqy týrızmniń damýyna jańa qarqyn beretin Syǵanaq, Otyrar jáne Saýran tarıhı qalalaryn qalpyna keltirý jumystaryn qolǵa alý týraly usynys aıtty.
Mádenıet jáne sport mınıstriniń orynbasary Nurǵısa Dáýeshovtiń aıtýynsha, Syǵanaq qalasyn qalpyna keltirý jumystaryn júzege asyrý 2020 jylǵa josparlanyp otyr.
Senator Dınar Nóketaeva óz sózinde «tarıhı-mádenı murany saqtaý – ulttyń sáıkestendirý kody» dep atap ótti. Depýtat sondaı-aq atalǵan zań jobasynda 25 myńǵa jýyq tarıhı-mádenı obektilerdi, sonyń ishinde 11 myńnan astam jergilikti, 248 respýblıkalyq mańyzy bar tarıhı jáne mádenı eskertkishterdiń saqtalýyn qamtamasyz etýdiń jańa talaptary men tetikteri usynylatynyn aıtty.
Zań jobalary Palata qaraýyna berildi.
