Kezdesý sharalary 15-ke jýyq oqý ornynda, Almaty memlekettik jańa tehnologııalar kolledji, Halyqaralyq bıznes jáne kommýnıkasııa kolledjinde, Almaty polıgafııa kolledjinde, Almaty memlekettik servıstik qyzmet kórsetý kolledjinde, №2 Pedagogıkalyq kolledjinde, Almaty qurylys jáne menedjment kolledjderi syndy kóptegen bilim mekemelerinde ótti.
Kezdesýlerde Jeltoqsan qatysýshylary árqaısysy ózderiniń basynan ótkizgen qasiretterin, qatysýshy stýdentterdiń jasyndaı bolǵan shaqtarynda ata-analaryn, balalaryn oılamaı, Táýelsizdik jolynda ózderin aıamaı, bolashaqqa qadam jasaǵandyqtaryn kózderine jas ala otyryp, eshqaıda jazylmaǵan, esh jerde aıtylmaǵan shyndyqtarymen bólisti.
«...Iá, jeltoqsan basylǵanan keıin úıge barǵanymda kórshi-qolań Almatyda ne bolǵanyn suraı bastady. Keshke ákem marqum jumystan kelip maǵan: «Balam aýzyńa ıe bol! Bul ókimettiń quryǵy uzyn. Eger seni ustaıtyn bolsa myna úı-ishińdi Jezqazǵannyń betpaǵyna ma, Qyzylordanyń qumyna ma kóshirip tastaıdy. Sodan keıin bir-birimizdi tappaı júremiz», – dep aıtqany máńgilik esimde qaldy. Jeltoqsanda, tań azanda alańǵa barǵan úsh jigit edik. Bul kúnde qarasam sol jerge taqta tas ornatylypty. Sol kezde eki tilde jazǵan uranymyz «Ár halyqqa – óz kósemi» sózi eskertkish tasqa oıylyp jazylypty. Meni alańǵa alyp shyqqan atalarymnyń rýhy», - deıdi jeltoqsanshy Erlik Omarov.
Árbir kezdesý barysynda oqý mekemeleriniń jas ónerpazdary tarapynan taqyrypqa saı monolog oqyldy jáne belgili aqyndardyń óleńderinen úzindiler keltirilip, qoıylymdar kórsetildi, júrek tebirenter kúı oınatylyp, ánder de shyrqaldy. Stýdentter ǵana emes Jeltoqsan qatysýshylary da ózderiniń júrekjardy óleńderin oqyp, dombyramen kúı shertip, hor bolyp án de aıtty.
Túrli saryndaǵy kezdesýler stýdentterdiń qyzyǵýshylyqtaryn oıatyp, kókeılerinde júrgen suraqtaryn da qoıyp, jaýaptar alyp otyrdy. Tipten stýdentterdiń biri bylaı dep pikir bildirdi: «Bizdiń kitaptan oqyǵanymyz, gazet-jýrnal, ǵalamtordaǵy málimetter, ustazdardyń aıtqandary bári-bári myna aıtylǵan shyndyqtardyń qasynda 1 paıyzǵa da jetpeıdi eken ǵoı!..».
Jeltoqsan oqıǵasyn kózben kórgendermen kezdesip, bastarynan ótken aýyrtpashylyqtaryn estigen stýdentter men qonaqtardyń áser-pikirleri boıynsha bul kezdesýlerdiń bosqa ótpegenine rıza.
Atalmysh shara Almaty qalasy Qoǵamdyq damý basqarmasynyń tapsyrysy boıynsha halyqaralyq «Janashyr» qoǵamdyq qory júzege asyratyn «Patrıottyq rýh – basty qundylyq» jobasynyń is-sharalar jospary aıasynda júrgizilip otyr.
ALMATY
