Zeınetaqy júıesin jańǵyrtý jáne áıelderdiń zeınetke shyǵý jasyn ulǵaıtý jónindegi zańnyń qabyldanýyn 35 jyldan astam otandyq qulaq-muryn-tamaq jáne jaq-bet-álpet aýrýlaryna joǵary mamandandyrylǵan dıagnostıkalyq-emdik kómek kórsetip kele jatqan emdeý orny – Almaty qalalyq №5 klınıkalyq aýrýhanasynyń ujymy da talqylady. Oǵan Almaty qalasy boıynsha baqylaý jáne áleýmettik qorǵaý departamenti dırektorynyń orynbasary Gúlsara Altynbekova qatysyp, kóterilgen máselege qatysty saýaldarǵa jaýap berdi.
Negizi baıandamany aýrýhananyń bólim meńgerýshisi, medısına ǵylymdarynyń kandıdaty Amangeldi Seıitqulov jasap, bul máseleniń elimizdiń árbir azamatyna qatysy bar ekenin aıta kele, áıelderdiń zeınet jasyn uzartý normasy men erler men áıelderdiń zeınetke shyǵý jasyn teńestirýdiń ózekti taqyrypqa aınalyp otyrǵanyn, sol sebepti zeınetaqy júıesin jańartý boıynsha halyq arasynda túsindirý qajettigin jetkizip, óz oıyn bildirdi.
Búginde elimizde eńbek etip júrgen áıel adamdardyń sany jyl saıyn artyp keledi, dedi jıynda balalar jaq-bet aımaǵy bóliminiń meńgerýshisi, medısına ǵylymdarynyń doktory, professor Serik Nurmaǵanov. Dúnıe júzinde 58 jastaǵy adamdar orta býynǵa jatady. Bul kórsetkish densaýlyq, áleýmettik, ekonomıkalyq, turmystyq jaǵynan qaraǵanda, adamnyń eń joǵary damyǵan kezi dep esepteledi. Sondyqtan osy jasta eńbek etý elimizdiń jáne otbasynyń turmys jaǵdaıyn jaqsartýǵa áser etedi dep oılaımyn.
Talqylaý barysynda, ásirese, osy aýrýhanada 21 jyl aǵa medbıke bolyp jumys jasap, osydan bes jyl buryn zeınetke shyqqan Sáýle Aqjanovanyń sózi kókeıge qonymdy shyqty. Zeınetaqy reformasy búgingi tańda kerek dep esepteımin, dedi Sáýle Kárimqyzy. Árıne, qaı reformanyń da óziniń artyqshylyǵy men kemshilikteri bolady. Biraq, memleketimizdiń ósýi, damýy jaǵynan qaraǵanda, bul reforma elimizdiń ekonomıkasyna óte mańyzdy jáne qolaıly. 58-63 jasqa deıingi bes jyldyń ishinde jınaqtaǵan aqshamyz kóbeıedi. Ásirese, zań zeınetaqy júıesin jańǵyrtýǵa yńǵaıly. Kóptegen áıelder zeınetker bolǵanmen jumys istep júr. Mysaly, bizdiń aýrýhanada onnan astam qyzmetker áli kúnge deıin ujymǵa óz úlesterin qosyp, jas mamandarǵa tájirıbelerin úıretip, medısına qyzmetkerleriniń abyroıyn túsirmeı kele jatqan abzal jandar.
Sondaı-aq, Almaty qalasynyń shtattan tys otorınolarıtology Gúlnár Ýalıeva, t.b. shyǵyp, óz oılaryn ortaǵa saldy.
Jıyndy qorytqan Gúlsara Altynbekova zań qabyldanǵanmen, áli de halyqtyń arasynda nasıhat jumystaryn júrgizý kerektigin alǵa tartty.
Gúlzeınep SÁDIRQYZY,
«Egemen Qazaqstan».
