Bıylǵy jyldyń maýsym aıynda Semeıdegi Abaı mýzeıiniń qyzmetkerleri Tatarstannyń astanasy Qazan qalasyndaǵy Qazan federaldyq ýnıversıtetine qarasty Lobachevskıı atyndaǵy kitaphanadan 1885 jyly burynǵy Semeı oblysy Shar óńirinde Abaı Qunanbaıulynyń basshylyǵymen jazylǵan «Qaramola Erejesiniń» arnaıy jınaq retinde jaryq kórgen túpnusqasyn tapqandyqtaryn jáne kóshirmesin mýzeı qoryna ákelgendikterin súıinshileı habarlaǵan bolatyn.
Jaqynda О́skemendegi Sársen Amanjolov atyndaǵy Shyǵys Qazaqstan memlekettik ýnıversıtetiniń rektory Muhtar Tólegen qundy qujatqa qatysty taǵy da bir jaǵymdy jańalyqty jetkizdi.
«Jýyqta Shyǵys Qazaqstannan arnaıy delegasııa Tatarstanǵa baryp qaıttyq. Qazan qalasyndaǵy Qazan federaldyq ýnıversıtetinde ótken kezdesý barysynda qazaqtyń uly aqyny Abaı Qunanbaıulynyń 1885 jyly jazylǵan «Qaramola Erejesiniń» túpnusqasyn ýaqytsha elge ákelý jóninde kelisimge keldik. Joǵary deńgeıdegi kezdesýge Tatarstannyń Qazaqstandaǵy ókiletti ókili D.Valeev, QFÝ prorektory L.Latypov, QR Joǵarǵy sotynyń sýdıasy B.Jumaǵulov, oblystyq sottyń tóraǵasy N.Qaıyrbekov, oblystyq sottyń sýdıasy E.Jumaqsanov qatysty. Abaı atamyzdyń 175 jyldyq mereıtoıy qarsańynda aqynnyń Qazan qalasyndaǵy baspahanada basylyp shyqqan, osyndaǵy N.Lobachevskıı atyndaǵy ǵylymı kitaphanada saqtaýly turǵan erejeler jınaǵynyń túpnusqasyn elge ákelsek nur ústine nur bolary anyq.
Bir ǵajaby, bul eńbek 74 baptan turady, Abaı atamyz muny 3 kúnde jazyp shyqqan degen derekter bar. Biz qundy qujatty Tatarstandaǵy áriptesterimizden bir-eki aıǵa surap otyrmyz. Aldaǵy ýaqytta «Qaramola Erejesin» aýdaryp, kırıll qarpine túsirip, kitap qylyp shyǵarmaq oıymyz bar» deıdi ýnıversıtet rektory.
О́SKEMEN
