Tuńǵysh Prezıdent – Elbasy N. Nazarbaevtyń tapsyrmasymen 2019 jyldyń qańtar aıynan bastap eń tómengi jalaqy mólsherlemesi 1,5 ese 42500 teńgege deıin ósti. Osy jyldyń 1 maýsymynan bastap shamamen 1,5 mlrd azamattyq qyzmetshiniń jalaqysyn kóterýge 300 mlrd teńgege jýyq qarajat baǵyttaldy. Jalaqysy tómen jumysshylardyń eńbekaqysy 32,5%-ǵa ósti.
«Kelesi jyldan bastap Memleket basshysynyń tapsyrmasyna sáıkes 500 myń muǵalimniń jalaqysy 25%-ǵa artady. Sondaı-aq 34 myń mádenıet, óner jáne muraǵat qyzmetkerleriniń jalaqysy 30%-ǵa, 215 myń dárigerge 30%-ǵa jáne medbıkelerge 20%-ǵa, 25 myń áleýmettik qyzmetkerlerge orta eseppen 30%-ǵa kóteriledi dep kútilýde» dedi B. Saparbaev.
Onyń aıtýynsha, bıyl qazaqstandyqtardy borysh júktemesin azaıtý máselesi tolǵandyrdy. Atalǵan sharamen 565 myńǵa jýyq qazaqstandyq qamtyldy. Ol úshin bıýdjetten 115 mlrd teńge bólindi.
«Sondaı-aq aıyppuldar men ósimpuldardy esepten shyǵarý týraly tapsyrma berildi. Bul sharamen 33,6 mlrd tg somasyna shamamen 1,2 mln otandasymyz qamtyldy. Bıyl bıýdjette aqsha qarastyrylǵan. Biz áleýmettik sala qyzmetkerleriniń jalaqysyn odan ári kóterýdi josparlap otyrmyz» dedi Qazaqstan Respýblıkasynyń Premer-Mınıstriniń orynbasary.
2,2 mln qazaqstandyqtyń zeınetaqysy 7%-ǵa, memlekettik járdemaqy 5%-ǵa ındeksasııalanady. Memlekettik áleýmettik saqtandyrý qorynan úsh áleýmettik tólem túri boıynsha 132 myń alýshy úshin járdemaqy keminde 30%-ǵa ósedi.
