Atalmysh sharaǵa Mańǵystaý oblysy ákiminiń orynbasary Q.Jumashev, jazýshynyń uly Kekilbaı Dáýlet Ábishuly men nemeresi Ábish Baıazıt Dáýletuly, ólke zertteýshileri, jazýshylar Ábilqaıyr Span, Otynshy Kóshbaı, Alqajan Edilhan, jas ábishtanýshy Baqtybaı Jaılaý, sondaı-aq jas aqyndar men ónerpazdar qatysty.
Saltanat kemeńger tulǵanyń ǵıbratty ómir joly, atqarǵan qyzmetteri týraly aqparattar qabyrǵalarda kórinis tapqan Ábish Kekilbaıuly atyndaǵy ǵylymı-zertteý zerthanasynyń tanystyrýymen bastaldy.
-Ábish Kekilbaıuly atyndaǵy ǵylymı-zertteý zerthanasyndaǵy kemeńger tulǵanyń ǵıbratty ómir joly, atqarǵan qyzmetteri týraly aqparattar qabyrǵalarda kórinis tapqan. Aqparattar Prezıdentimiz Qasymjomart Toqaevtyń Ábish Kekilbaıuly týraly aıtylǵan qundy pikirinen bastalady.
Tórdegi qabyrǵaǵa ómir joly, qyzmeti, shyǵarmashylyǵy týraly negizgi málimetter berildi. Oń jaǵynda Qara sózdiń súleıi atanǵan sóz sheberi, oıshyl, ǵulama Abyzdyń nebir oı oramdary búginde naqylǵa aınalyp ketti. Abyzdan qalǵan asyl sóz stendisinde osyndaı túıindi oı oramdarynan úzindiler berilgen. Sol jaǵynda «Ashyq aspan astyndaǵy murajaı», tabıǵattyń tańǵajaıyby dep baǵalaǵan kıeli mekeni Mańǵystaýǵa degen sheksiz perzenttik súıispenshiligin,erkeshe shabytyn tanytatyn «Týǵan jer» óleńinen úzindi berilgen. Sondaı-aq, «Zamananyń zańǵar tulǵasy» stendisinde kórnekti memleket jáne qoǵam qaıratkeri retinde atqarǵan laýazymdyq qyzmetteri, memleketimizdiń tuǵyrly baǵyttaryn aıqyndaý, ıdeologııasyn qalyptastyrýdaǵy orasan zor eńbekteri toptassa, ádebıettiń barlyq janrynda qalam terbegen sýretker kórkem proza, poezııa men dramatýrgııada keńinen tolǵap, máńgi ólmes týyndylaryn jazǵan «Á. Kekilbaevtyń shyǵarmalary» bóliminde 12 kitaby kórinis tapqan. Qr kod qosymshasy arqyly bilimalýshylar smartfondaryna júktep alyp kez kelgen shyǵarmasyn oqyp,tyńdaı alady Sonymen qosa uly sýretkerdiń qalamynan ár jyldarda jaryq kórgen eńbekteri arnaıy kitap sóresine qoıylǵan. Bıylǵy jyly Kemeńger tulǵanyń 80 jyldyǵyna oraı jaryq kórgen Prezıdentimiz Qasymjomart Kemeluly Toqaevtyń alǵysózimen shyqqan Saýytbek Ábdirahmanovtyń «Abyz Ábish» kitaby ábishtanýǵa qosylǵan úlken eńbek. Jáne Ǵarıfolla Esimniń redaktorlyǵymen Ábish Kekilbaev ensıklopedııasynyń 3 tomdyǵy jaryq kórdi.
Interaktıvti taqta arqyly stýdentter men magıstranttar beınefılmder, elektrondy oqýlyqtar, aýdıokitaptar, derekti fılmderdi kórip, oqı alady. Osylaısha bilimalýshylar úshin kitap oqýlaryna, elektrondyq nusqalarymen de jumys jasaýlaryna tolyqtaı múmkindik berilgen, deıdi sharanyń jáne zerthananyń uıymdastyrýshysy «Qazaq fılılogııasy» kafedrasynyń meńgerýshisi Aqmaral Otarova.
Aqmaral Otarovanyń aıtýynsha, uly jazýshynyń rýhanı murasyn zertteý isi ýnıversıtette qyzý júrgizilýde. Dıplomdyq jobalar, magıstrlik dıssertasııalar qorǵalyp, professor oqytýshylar Ábish Kekilbaev shyǵarmashylyǵyn tildik, ádebı turǵyda zerttep, zerdelep, ǵylymı maqala, joba jumystaryn, monografııa, oqýlyqtar jazýda. Sondyqtan da uly tulǵanyń baı rýhanı muralarynyń taǵylymyn jastar boıyna sińire berý ustazdyq mindetimiz bola bermek, deıdi ol.
Qorytyndylaý keshiniń «Kemeńger Kekilbaev keńistigi» atty jergilikti əbishtanýshylarmen kezdesý bólimi Mańǵystaý oblysy ákiminiń orynbasary Jumashev Qanybek Bekbolatuly men ýnıversıtet rektory Ahmetov Berik Baqytjanulynyń kirispe sózimen ashyldy.
О́lkemizge belgili ólketanýshylar men zertteýshiler dara tulǵanyń ult rýhanııaty men memleket isine sińirgen eńbekteri týraly oı bólisip, qyzyqty estelikterin ortaǵa saldy.
Shara sońynda ýnıversıtette ótken dástúrli III Ábish oqýlary baıqaýynyń júldegerleri men jeńimpazdaryna arnaıy dıplomdar men marapattardy Kekilbaı Dáýlet Ábishuly tabys etti.
Ǵasyr kemeńgeri atanǵan zamanynyń zańǵar jazýshy Ábish aǵa Kekilbaıulynyń rýhanı murasynan sýsyndaǵan óskeleń urpaq boıynda adamı qundylyqtardy qalyptastyryp, ónegeli ómirinen ǵıbrat ala beretini sózsiz.
Jınalǵan kópshilik joǵary dárejede uıymshyldyqpen ótken mazmundy sharaǵa rızashylyq sezimde boldy.
Keshte málim bolǵan taǵy bir jańalyq – oqý ornynyń rektory B.Ahmetovtyń aıtýynsha, qysqy sessııa qorytyndysymen úzdik dep tanylǵan stýdentterge Á.Kekilbaev atyndaǵy shákirtaqy berilmek.
