Kelýshilerge óńir tarıhy men jetken jetistikteri týraly beınefılm kórsetildi. Sonymen qatar óńir tarıhyn túgendegen «Taraz muralary» atty tarıhı-tanymdyq 80 tomdyq kitaptyń tusaýy kesildi. Kórnekti abaıtanýshy ǵalym Mekemtas Myrzahmetuly men tarıh ǵylymdarynyń doktory Talas Omarbekov kitaptyń lentasyn qıdy. Jıynda sóz alǵan Talas Omarbekov Áýlıeata óńirinen shyqqan talaı tuǵyrly tulǵalardyń bar ekenin aıta kelip, osyndaı rýhanı muralardy urpaqtan-urpaqqa jalǵastyryp otyrý kerektigin jetkizdi. Sonymen qatar ǵalym 80 tomdyq kitapty Prezıdent kitaphanasyna, Ǵylymı kitaphanaǵa tapsyratynyn aıtyp, kitaptardy Mádenıet jáne sport mınıstri Aqtoty Raıymqulovaǵa tabys etti.
Mınıstr Aqtoty Raıymqulova Premer-Mınıstr Asqar Mamınniń quttyqtaý hatyn oqyp berip, ony Jambyl oblysynyń ákimi Asqar Myrzahmetovke saltanatty túrde tapsyrdy. «Qadirmendi oblys turǵyndary! Sizderdi Jambyl oblysynyń 80 jyldyq mereıtoıymen quttyqtaımyn! Qazaqstan Respýblıkasynyń Tuńǵysh Prezıdenti – Elbasy NNursultan Ábishuly Nazarbaev «Bul ólke – bir kezderi qudiretti Qarahan memleketi saltanat qurǵan, Qazaq handyǵy irge kóterip, týyn tikken jer. Júz jasaǵan Jambyl atamyzdyń atyn ıemdengen ejelgi Áýlıeata jeri – «altyn qursaqty» óńir. Kúmis kómeı ánshiler men dáýlesker kúıshiler, bilikti bıler men bilekti batyrlar ótken berekeli aımaq» dep erekshe atap ótken bolatyn.
Memleket basshysy Qasym-Jomart Kemeluly Toqaev Jambyl oblysynyń damýyna úlken mán beredi. Qazirgi tańda elimizdiń ekonomıkasyn damytýǵa, mádenıeti men rýhanııatyn baıytýǵa óńirdiń qosyp otyrǵan úlesi aıryqsha. Jambyl oblysy hımııa ónerkásibiniń flagmany, balamaly energııa kózderin óndiriske alǵash engizgen óńir bolyp tabylady. Munda halyqtyń turmys sapasyn arttyrýǵa baǵyttalǵan jańa bastamalar, pılottyq jobalar iske asyrylýda.
Oblys mereıtoıy aıasynda búgin osy óńirdiń áleýmettik-ekonomıkalyq damýy men urpaqqa úlgi bolar tereń tarıhyna kýá bolyp otyrmyz. Jańadan ashylǵan «Tekturmas» etnotarıhı, «Shahrıstan» etnomádenı keshenderinde Áýlıeataǵa, Kenen Ázirbaevqa, Asqar Toqpanovqa arnalǵan eskertkishter men oblystyq ólketaný mýzeıi, «Rýhanııat jáne tarıhtaný ortalyǵy», «Sheberler jáne týrızm ortalyǵy», «Kórkemsýret galereıasy», Amfıteatr, «Saǵat» stellasy sııaqty shyǵys sáýlet úlgisindegi ǵımarattar – taǵylymy mol tarıhty tanýǵa, óńir mádenıeti men dástúrin jańǵyrtýǵa, týrızmdi damytýǵa aıtarlyqtaı úles qosady dep senemin. Birligi men tirligi jarasqan mereıli ólkeniń torqaly toıy qutty bolsyn! Barshańyzǵa baq-bereke, otbasylaryńyzǵa amandyq tileımin» delingen Úkimet basshysynyń quttyqtaýynda.
Sonymen qatar jıynda Taraz qalalyq máslıhatynyń hatshysy Batyrbek Qulekeev, №1 mektep-gımnazııasy dırektorynyń orynbasary Anastasııa Gýseva da quttyqtaý sóz sóıledi. Budan keıin oblys ákimi Asqar Myrzahmetov birqatar azamattardy «Jambyl oblysyna sińirgen eńbegi úshin» tósbelgisimen marapattady. Olardyń qatarynda Asanáli Áshimov, Mekemtas Myrzahmetuly, Mámbet Qoıgeldıev, Altynbek Qorazbaev, Gúljan Áspetova, Tuńǵyshbaı Jamanqulov syndy ádebıet, óner, ǵylym salasynyń qaıratkerleri jáne ózge de tanymal tulǵalar bar.
