«Qordyń basty mıssııasy – úlestik turǵyn úı qurylysyn damytý jolymen el halqyn turǵyn úımen qamtamasyz etý. Biz úlestik turǵyn úı qurylysyna kepildik berý salasyndaǵy memlekettiń mindetterin sheshýdi qamtamasyz ete otyryp, halyqtyń qorǵa degen senim deńgeıin arttyrýǵa tyrysamyz», dedi qor ókilderi.
Endi salýshylar ǵana emes, qurylysqa úlestik qatysýshylar da Turǵyn úı qurylysyn kepildendirý qorynan kepildik ala alady. Bul qandaı ónim jáne úleskerler qandaı jaǵdaıda kepildikti paıdalana alady degen suraqqa TQKQ Kelisimsharttar esebi jáne statıstıka departamentiniń dırektory Alıma Seıtqazıeva jaýap berdi.
Atalǵan qordyń basty qyzmeti salýshy qurylys nysanyn ózdiginen aıaqtaı almaǵan jaǵdaıda turǵyn úı qurylysyn aıaqtaýǵa kepildik usyný bolyp sanalady. Iаǵnı, qor úleskerlerge kepildigi bar nysan qurylysy mindetti túrde aıaqtalyp, olar óz baspanasyn alatynyna kepildik beredi. Qurylysty aıaqtaýǵa kepildik alý kezinde salýshylar tap bolatyn basty problema – qurylystyń qarjylandyrylý kózi retindegi úlesterdi tez arada satý. Osy oraıda qor jańa ónim jasaý boıynsha jumys júrgizdi.
«Qor qurylysty aıaqtaýǵa kepildigi bar nysannyń úlesin alýǵa nıetti úleskerdiń nesıesi boıynsha kepildik usynyp otyr. Daıyn baspanaǵa qaraǵanda, qurylysy endi bastalǵan baspananyń quny arzan bolatyny belgili. Bizdiń ónim, eń aldymen, turǵyndardy baspanamen qamtýǵa, sonymen birge turǵyn úı qurylysyn jandandyrýǵa arnalǵan», dep atap ótti Alıma Seıtqazıeva.
Sondaı-aq qordyń kepildigi bolǵan jaǵdaıda qosymsha kepil qajet bolmaıdy, tek baspana qunynyń 20%-na teń bastapqy jarna bolsa boldy. Osylaısha, qoljetimdilik qamtamasyz etiledi. Bastysy, úlesker páterdi qor kepildendirgen turǵyn úı kesheninen tańdap alsa bolǵany.
«Atap ótý kerek, qordyń úlesker nesıesi boıynsha usynyp otyrǵan kepildigi nysan qurylysy men ony paıdalanýǵa berý merzimi aralyǵyna ǵana jaramdy. Nysan paıdalanýǵa berilgen ýaqyttan bastap, bankke ıpotekanyń qalǵan merzimine daıyn baspana tolyqtaı kepil bola alady», dep túsindirdi TQKQ ókili.
Taǵy bir eskeretin jaıt, jańa ónim arqyly úlesker tıisti kirisi bolsa, 60 mln teńgege deıin baspana alýǵa múmkindik alady.
«Bastapqy jarna 20 paıyz jáne nesıeniń maksımaldy somasy 50 mln teńge bolǵan jaǵdaıda úleskerdiń quny 60 mln teńge bolatyn úlesti alýǵa múmkindigi bar. Bul tusta úlesker qor men banktiń talaptaryna saı bolýy tıis. Jańa ónimge qatysty talaptardy úsh bank ıgerýde, bir bank atalǵan ónimdi qoldap otyr», dep naqtylady Alıma Seıtqazıeva.
Búginde ekinshi deńgeıli barlyq bank, qurylys júrgizýshiler men úleskerler ónimge úlken qyzyǵýshylyq tanytyp otyr.
Turǵyn úı qurylysyn kepildendirý qorynyń baspasóz qyzmeti
