Bas prokýror atap ótkendeı, eldegi krımınogendik jaǵdaı jaqsarǵan. О́tken jylmen salystyrǵanda qylmystyq quqyq buzýshylyqtar sany 17 %-ǵa azaıdy. Kisi óltirý 11%-ǵa, buzaqylyq 28%-ǵa, esirtki qylmysy 12%-ǵa qysqarǵan.
«Biz kez kelgen zań buzýshylyqtarǵa der kezinde tótep berýge tıispiz. Eń tıimdisi olarǵa jol bermeý», – dedi Bas prokýror. Ol, quqyq buzýshylyqtyń aldyn alý máselelerine egjeı-tegjeıli toqtalyp ótti.
Alqa otyrysynda qoǵamdyq múddelerdi qorǵaý salasyndaǵy tekserýlerdiń nátıjeleri aıtyldy. Prokýrorlardyń kómegimen 30 myń qyzmetkerdiń jalaqysy ótelgen. Bereshektiń jalpy somasy 2 mlrd teńgeden astam.
Prokýrorlyq yqpal etý aktileri boıynsha 17 myńnan astam adam ártúrli jaýapkershilikke tartyldy. Memleket kirisine 30 mlrd teńge óndirilip alynǵan. 37 myń paıdalanylmaıtyn jer telimderi keri qaıtaryldy.
Sottarda 47 mlrd teńge somasynda memlekettiń múddesi qorǵalǵan.
Bas prokýror Memleket basshysy Joldaýynyń negizgi baǵyttaryna aıryqsha mán berdi. Qylmystyq proseste zańdylyqty qamtamasyz etýde jáne adam quqyqtaryn saqtaýda prokýrorlardyń úılestirýshi róline basa nazar aýdardy.
Osy jyly prokýrorlar 219 adamdy negizsiz qýdalaýdy toqtatty. Qyzmettik úı-jaılardan jáne ızolıatorlardan 725 zańsyz ustalǵan adam bosatylǵan.
Prokýrorlardyń ótinishteri men narazylyqtary boıynsha sottar 1172 azamatqa qatysty úkimdi qaıta qarady. Prokýrorlardyń bastamasymen 36 adam aqtalǵan.
Qadaǵalaý organynyń jumysyn qorytyndylaı kele, Ǵızat Nurdáýletov azamattardyń konstıtýsııalyq quqyqtaryn qorǵaý, qoǵamda quqyqtyq tártipti qamtamasyz etý boıynsha barlyq kúsh-jigerdi jumsaýdy tapsyrdy.
«Prokýratýra organdarynyń qoljetimdiligin odan ári arttyrý qajet. Árbir aryz boıynsha jedel ári tynymsyz jumys isteý kerek. Jurtshylyqpen etene qarym-qatynas – negizgi basymdyqtardyń biri. Biz resmı kózqarastan múldem arylýymyz qajet», – dep túıindedi sózin Bas prokýror.
Alqa otyrysynyń qorytyndysy boıynsha qadaǵalaý vedomstvosynyń basshysy aldaǵy jylǵa arnalǵan basym mindetterdi aıqyndap, negizgi baǵyttardy belgiledi.
