Almaty qalasynda ornalasqan Qazaqstan-Japon ınnovasııalyq ortalyǵynyń qyzmetkerleri qan quramyndaǵy sary sýdy jaqynnan sáýlelendirý arqyly qaı músheniń obyrǵa shaldyqqanyn on mınót ishinde dóp basyp aıta alady. Osydan úsh jyl buryn qolǵa alynǵan bul istiń nátıjesi bar kórinedi. Atalǵan merzim aralyǵynda ǵalymdar jeke klınıkalarmen birlesip, myń jarymǵa tarta azamattyń qan quramyn teksergen. Sonda olardyń qaterli isikke shaldyqqany dáleldenipti. Soǵan qaramastan, bul tásil elimizdiń medısına salasyna áli tolyq engizilmegen. Basty sebep, qarajat tapshylyǵy qolbaılaý bolyp tur.
Statıstıkalyq derekke júginsek, jyl saıyn 30 myńdaı qazaqstandyq qaterli isikpen esepke alynady eken. Al álem boıynsha 10 mln. adam tirkeýge alynǵan. Dárigerler ázirge qaterli isikti túbirimen joıatyn em-domdy tapqan joq. Jalpy, el arasynda «jaman aýrý» atalyp ketken osy syrqat 5 satyǵa bólinedi. Aýrýdyń jańa paıda bolǵan kezi medısına tilimen aıtsaq, rak ınsıto dep atalady. Ekinshi satysynda ol úlkeıip, kelesi qabatqa ótedi. Úshinshi, tórtinshi satylarynda dert asqynyp, túıin salyp taraıdy. Sońǵy kezeńi óte qaýipti. Al Qazaqstan-Japon ınnovasııalyq ortalyǵynyń dırektory Dıas Myrzaqoja tyń tásil negizinde qaterli isikti jedel anyqtap, adam ómirin birshama uzartýǵa qadam jasalyp otyrǵanyn aıtady.
Ámirhan ALMAǴANBETOV,
«Egemen Qazaqstan».
