Pákstannyń soltústik-batysy Dera-Ismaıl-Han qalasynda «Talıban» radıkaldy qozǵalysynyń sodyrlary óz ókilderin bosatý maqsatynda túrmege shabýyl jasady. Bul týraly «Reıter» agenttiginiń aqparyna silteme jasaǵan ITAR-TASS habarlap otyr.
Dera-Ismaıl-Han qalasyndaǵy túrmede shamamen bes myń adam qamaýda ustalǵan bolatyn. Olardyń ishinde 250 qylmysker «Terıh-ı-talıban Pákstan» men ózge de ekstremıstik toptardyń ókilderi bar
Talıbterdiń ókili Shahıdýlla Shahıdtiń sózine qaraǵanda, olar óz jaqtaýshylaryn bosatýǵa júz sodyr men jeti jankeshti jibergen. Olar jarylǵysh zattardy qoldaný arqyly túrmeniń elektr qýatyn isten shyǵaryp, qaqpasy men qabyrǵalaryn buzyp, ishke kirgen. Buǵan qosa, sodyrlar túrme janyndaǵy turǵyn úı men aýrýhana shatyryna ornalasyp, sol jerden áskerıler men polısııa qyzmetkerlerine oq jaýdyrǵan.
Bir qyzyǵy, Haıber-Pahtýnhva provınsııasy túrmeleriniń basshysy Halıd Abbastyń aıtýynsha, shabýyl jóninde bılik bir apta buryn habardar bolǵan. Alaıda, onyń tez arada oryn alatynyn kútpegen kórinedi.
RIA «Novostı» agenttiginiń habarlaýynsha, talıbter túrmege jasalǵan shabýyldyń sátti ótkenin, sondaı-aq 300-ge jýyq qylmyskerdiń bosatylǵanyn málimdegen.
«Jalpy 243 adam túrmeden qashyp shyqqan, onyń altaýy keıinirek quqyq qorǵaýshylardyń izdestirý jumystary nátıjesinde quryqtaldy. Al qashqyndardyń arasynda 30 adam asa qaýipti qylmysker sanalady», – dep málimdedi Pákstan úkimetiniń ókili Mýshtak Djadýn.
Aıdar О́risbaev.
