Aqtaýdaǵy oblystyq psıhonevrologııalyq ınternat úıiniń 12 qyzmetkeri «balalardy uryp-soqty» degen derekpen jumystan shyǵarylǵan. Oǵan emdeý ornyndaǵy beıne baqylaýǵa túsirilgen jazbalar dálel bola alady. Bul týraly «Qazaqstan» telearnasy habarlady.
Joǵaryda atalǵan ınternat úıiniń 10 jasar tárbıelenýshisi Iаna Bondarchýktyń denesi kókala bolyp qantalaǵanda, ınternat qyzmetkerleri Iаnanyń anasyna «balańyz qan tamyry aýrýyna shaldyqqan» dep qarsy daý aıtqan edi. Ile ǵımarattaǵy beıne baqylaý ony tárbıeshiniń urǵanyn aıǵaqtap berdi.
«Psıhonevrologııalyq ınternat úıindegi 12 tárbıeshi jumystan shyǵaryldy. Sonymen birge, osy mekemeniń basshysy jáne 5 tárbıeshi ákimshilik jaýapkershilikke tartyldy», - deıdi Aqtaý qalasynyń prokýrory Talǵat Álibaev.
Quqyq qorǵaý qyzmetkerleri tekseris kezinde bul jerden jaramsyz dári-dármekterdi paıdalanǵanyn anyqtady. Al ashanadan merzimi ótip ketken sút ónimderi tabylypty. Eń soraqysy, jarymjan balalar ǵımarat ishin tazalaǵan.
Danııar Túımebaı.
