«Elbasy Nursultan Nazarbaev «Bolashaqqa baǵdar: rýhanı jańǵyrý» atty maqalasynda qoǵamdyq sanany qaıta túletýdiń mańyzdylyǵy týraly aıtty. Ulttyq sanany saqtaý jáne ony zaman talabyna beıimdeý memlekettik mańyzy bar máselege aınaldy. О́ıtkeni sanany jańǵyrtý arqyly HHI ǵasyrda elimizdiń tyń serpinmen damýyna jol ashamyz. Osy oraıda Abaı murasynyń tıgizer paıdasy zor dep esepteımin. Uly aqynnyń shyǵarmalary búgin de ózektiligin joǵaltqan joq. Abaıdyń oı-tujyrymdary barshamyzǵa qashanda rýhanı azyq bola alady», dedi Q.Toqaev.
Osyǵan oraı S.Seıfýllın atyndaǵy Qazaq agrotehnıkalyq ýnıversıtetinde «Abaı – aqyn, oıshyl, aýdarmashy» atty ǵylymı semınar ótti. Sharaǵa ýnıversıtet basshylyǵy, ustazdar qaýymy jáne stýdentter qatysty.
«Álemde 190-daı memleket, eki myńdaı ult bar eken. Árbir ulttyń ulttyq bolmysy, tamyry, tarıhy óz aldyna erekshe. Qazaq ta óziniń tektiligimen, bilimdiligimen álemge tanylǵanyna shetelderge shyqqan saıyn kýá bolyp júrmiz. Syrttan keletin meımandar halqymyzdyń syrtqy kelbetine ǵana emes, ishki rýhanı qundylyqtarymyzǵa da kóz tastaıdy. Elimizge rýhanı ustaz bolyp, ult pen urpaqtyń qamy úshin ter tókken tulǵalarymyz az emes. Sol tulǵalarymyzdyń arasynda Abaı Qunanbaıulynyń alar orny aıryqsha desek artyq aıtqandyq bolmas, sirá. Bizdiń ýnıversıtettiń maqsaty – bilimdi mamandardy daıyndap qana qoımaı, otanshyl, patrıot perzentterdi de túletý. Ol úshin Abaıdy tereńirek oqý kerek», dedi S.Seıfýllın atyndaǵy Qazaq agrotehnıkalyq ýnıversıteti AQ basqarma tóraǵasy Aqylbek Kúrishbaev.
Sonymen qatar jıynda ýnıversıtettiń oqytýshylary, fılologııa ǵylymdarynyń doktory, dosent Sáýle Qurmanbaıqyzy «Sóz» konseptiniń Abaı shyǵarmalarynda reprezenttelýi», Fılosofııa kafedrasynyń meńgerýshisi, dosent Esbol Esenbaıuly «Abaı dúnıetanymyndaǵy «Adam men Álem» qatynasy máselesi, dosent Ásııa Serǵalıqyzy «Álem tanyǵan Abaı» taqyryptarynda baıandama jasap, hakimniń ómir joly men ádebı álemin sholyp ótti.
