Halyqqa adal qyzmet etý – mindetimiz - Prezıdenttik jastar kadr rezerviniń múshesi

Qoǵam • 20 Qańtar, 2020

Halyqqa adal qyzmet etý – mindetimiz - Prezıdenttik jastar kadr rezerviniń múshesi

53 ret kórsetildi

Memleket basshysy Qasym-Jomart Toqaev Aqorda rezıdensııasynda Prezıdenttik jastar kadr rezervine engen 300 adammen kezdeskende, arasynda men de boldym. Mańyzy zor, maqsaty aıqyn júzdesýde Qazaqstan Prezıdenti memlekettik apparat jumysyna jańa ádisterdi engizý máselesin alǵa tartyp, «Barlyq jańalyqtyń ortaq maqsaty – halyqqa jaqyn bolý. Shyn máninde, biz memleket qyzmetiniń servıstik modeli jaıynda áńgime qozǵap otyrmyz. Qazaqstanǵa qoǵamnyń talap-tilegine durys, tıimdi jáne ádiletti jaýap beretin memlekettik basqarýdyń jańa úlgisi kerek», degen edi. Bul eń aldymen jaýapkershilik júginiń salmaǵyn ańǵartsa kerek.

Prezıdenttik jastar kadr rezervine múshelikke qabyldanýǵa irikteýden ótkenimizben qatar, bizge biliktiligimizdi, jumys daǵdylarymyzdy, tulǵalyq qasıetterimizdi joǵarylatýǵa qatysty túrli keńester berildi. Bul keńester kásibıligimizdi shyńdap, jumysymyzdy júıelendirýge uıytqy boldy.

Prezıdenttik jastar kadr rezervi degenimiz ne? Ol – bilikti mamandardyń bilimin shyńdap, maqsat-murattaryn, tyń ıdeıalaryn is júzine asyrýǵa múmkindik beretin bastama. Oǵan kózim jetti. О́z basym memlekettik qyzmet salasynda on eki jylǵa jýyq qyzmet atqardym. Eńbek jolymdy ákimdikte jetekshi maman retinde bastap, birneshe jyldan keıin basqarma basshysy laýazymyna deıin joǵaryladym. Erinbeı eńbek etip, tabandylyqpen ter tóktim. Endigi kúni bul joba qyzmettik baspaldaǵymda odan ári joǵarylaýyma, jaýapkershilik júgin arqalap, halqyma adal qyzmet etýge jol ashty. Almaty qalasyndaǵy Túrksib aýdanynyń ákimi bolyp taǵaıyndaldym.

Aýdan turǵyndaryna meni Almaty qalasynyń ákimi Baqytjan Saǵyntaev tanystyryp, aq jol tiledi. Sol údeden shyǵyp, úmitti aqtaýǵa barymdy salmaqpyn. Maǵan senip tapsyrylǵan aýdan turǵyndarynyń taǵdyryna atústi qaramaı, kerisinshe olardyń ál-aýqatyn arttyrýdy kózdeımin. Áleýmettik máselerdi sheshýdi aldyńǵy orynǵa qoıyp, janǵa jaıly, kóńilge qolaıly ómir súrýlerine úlesimdi qossam
deımin.

Memleket basshysynyń Prezıdenttik jastar kadr rezervi múshelerimen júzdesýinde «Qazaqstan azamattary sheneýnikterdi qoǵamǵa qatysty barlyq sheshimderdi bılik dálizderinde qabyldaıtyn qandaı da bir tańdaýly top retinde qaramaýy kerek. Sheneýnikter qoljetimdi bolýy qajet. Memlekettik qyzmetshi halyqtyń ortasynda halyq úshin jumys isteıtin halyqtyń bir bóligi deýden esh jalyqpaımyn!» degen sózi jadymda jattalyp qaldy. Prezıdentimizdiń «Memlekettik qyzmetshi halyqtyń ortasynda halyq úshin jumys isteıtin halyqtyń bir bóligi» deýi meniń ómirlik ustanymyma aınaldy desem de bolady.

Ár adamnyń ómirlik joly, ustanymy bolady. «О́mirde eki nárseni tańdaýda qatelespe. Birinshisi – jar tańdaýda, ekinshisi – mamandyq tańdaýda» deıdi dana halqymyz. Mamandyq tańdaýdan qatelespedim. Sebebi elińe adal eńbek etip, týǵan halqyńnyń damýy, alǵa basýy jolynda tabandylyqpen tór tógýden asqan abyroı joq!

Baqytjan AQJAROV,

Prezıdenttik jastar kadr rezerviniń múshesi, Almaty qalasyndaǵy Túrksib aýdanynyń ákimi

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz