Onyń ishinde aýyl sharýashylyǵyn nesıeleýge jáne aýylsharýashylyq tehnıkasynyń lızıngine 448 mlrd-tan astam teńge jáne bıdaı satyp alýǵa 29 mlrd teńgege jýyq qarajat baǵyttaldy. Aıta ketelik, 2018 jyly bul baǵyttaǵy qarjylandyrý kólemi 400 mlrd teńgeni qurap, sonyń ishinde 385 mlrd teńge nesıe men lızıngke, 15 mlrd teńge bıdaı satyp alýǵa baǵyttalǵan bolatyn.
«QazAgro» holdınginiń nesıelik portfeli 886 mlrd teńge kórsetkishke jetip, qaryz alýshylar sany 77 myńǵa deıin ósti. Onyń 97 paıyzdan astam úlesi shaǵyn jáne orta bıznes ókilderine tıesili. Ulttyq holdıngtiń qarjylyq qoldaýy arqyly ótken jyly 37 myń aýyl turǵyny jumyspen qamtylyp, jańa jumys oryndaryna ıe boldy.
«QazAgro» holdıngi baspasóz qyzmetiniń habarlaýynsha, 2019 jyly jalpy quny 84 mlrd teńgeni quraıtyn 56 ınvestısııalyq joba qarjylandyryldy, sonyń ishinde 21 mlrd teńge somasyna 24 joba iske qosyldy, 770 jumys orny quryldy. 2020 jyly 56 mlrd teńge somasyna 31 ınvestısııalyq jobany iske qosý josparlanyp, onyń esesine 3 myń jumys ornyn qurý kózdelip otyr. Qazir qarjylandyrýǵa ótinimderdi qabyldaý jalǵasýda.
Byltyrǵy Memleket basshysynyń synynan soń «QazAgro» holdıngi óz qyzmetin reformalaý men tıimdiligin arttyrýǵa baǵyttalǵan sharalardy júzege asyrýda. Holdıng korporatıvtik basqarý sapasyn arttyrý maqsatynda enshiles kompanııalar sanyn qysqartý sheńberinde «QazAgroKepil» AQ kásipornyn «Aýyl sharýashylyǵyn qarjylaı qoldaý qory» AQ-qa qosý, «QazAgroО́nim» AQ kásipornyn «Agrarlyq nesıe korporasııasy» AQ-qa qosý jáne «Qazagromarketıng» AQ uıymyn taratý jumystaryn júrgizdi. Sonymen qatar 2020 jyly «Azyq-túlik kelisimshart korporasııasy» UK» AQ óz qyzmetin Aýyl sharýashylyǵy mınıstrliginiń quramynda jalǵastyratyny týraly sheshim qabyldandy. Osylaısha holdıngtiń qurylymynda 3 arnaıy qarjylandyrýshy kompanııa qalatyn bolady. Bul rette «Agrarlyq nesıe korporasııasy» AQ AО́K sýbektilerin nesıelendirý, nesıe seriktesterin, mıkroqarjy uıymdaryn, ekinshi deńgeıli bankter men lızıngtik kompanııalardy qorlandyrýmen aınalysady.
Al «Aýyl sharýashylyǵyn qarjylaı qoldaý qory» AQ shaǵyn bıznesti mıkroqarjylandyrý, qaryzdardy kepildendirý, AО́K saqtandyrý júıesine qatysýdy júzege asyrsa, «QazAgroQarjy» AQ aýyl sharýashylyǵy tehnıkasy men jabdyqtarynyń lızıngin beredi.
Aıta ketelik, byltyr «QazAgro» holdıngi syrtqy valıýtalyq boryshtaryn tolyǵymen ótep, 2020 jyldyń qorytyndysy boıynsha paıdaǵa shyǵý maqsatynda transformasııa baǵdarlamasyn qabyldaǵan bolatyn.
