Marhabat Baıǵuttyń 7 tomdyǵynyń tusaýkeseri ótti

Ádebıet • 25 Qańtar, 2020

Marhabat Baıǵuttyń 7 tomdyǵynyń tusaýkeseri ótti

259 ret kórsetildi

Túrkistan oblystyq Pýshkın atyndaǵy kitaphanada elimizge keńinen tanymal jazýshy-jýrnalıst Marhabat Baıǵuttyń 7 tomdyq shyǵarmalar jınaǵynyń tusaýkeser rásimi ótti.

Ǵalymjan ELShIBAI

Mádenıet jáne sport mınıstrligi Til saıasaty komıtetiniń qoldaýymen ótken jyldyń sońynda jaryq kórgen kitaptardyń tusaýkeser rásimine aqyn-jazýshylar jáne onyń shyǵarmashylyǵyn súıip oqıtyn oqyrmandar qatysty. Jazýshy Til saıasaty komıtetine 5 myń taralymmen shyqqan 7 tomdyq kitabyn elimizdiń túkpir-túkpirindegi kitaphanalarǵa taratý týraly ótinishin aıtypty.

Ádebı keshte kitaphanashylar Marhabat Baıǵuttyń mektep oqýshylary týraly jazǵan «Toǵyzynshy synyp» pesasyn qoıyp, kelgen qonaqtardy tereń oıǵa batyrdy. Bul qoıylymda týra joldan taıyp, nashaǵa elitip jas ómirin qor etken oqýshylardyń ómiri baıandalady. Áserli shyqqan qoıylymǵa razy bolǵan kórermender rızashylyqtaryn bildirdi. Sondaı-aq kesh barysynda Túlkibas aýdany ákiminiń orynbasary Erlan Kúzembaev bastaǵan delegasııa jazýshyǵa júrekjardy lebizderin jetkizdi. Erlan Kúzembaev kesh ıesiniń ádebıetke sińirgen eńbegi men jas daryndarǵa jol ashýda atqarǵan jumystary jóninde tarqatyp aıtty. «Marhabat Baıǵut árqashan jastardy qoldap júredi. Osy oraıda, shyǵarmashyl jastarǵa qol ushyn sozý maqsatynda 2013 jyly Túlkibasta Marhabat aǵanyń muryndyq bolýymen «Marhabat-Mıras» qoǵamdyq qory qurylǵan bolatyn. Atalǵan qor osy ýaqytqa deıin kóptegen ıgi isterdi júzege asyrdy. Aýdandyqtan bastap halyqaralyq deńgeıge deıin ádebı baıqaýlar ótkizildi, jas aqyn-jazýshylardyń kitaptary shyǵaryldy. Jastardyń elge tanylyp, shyńdalýyna jol ashty. «Marhabat oqýlary», «Shyraılym-Shubaıqyzylym» baıqaýlary da kóptegen talanttardyń tanylýyna septigin tıgizdi. Aýdanda «Aqsý-Jabaǵyly alaýy, Shubaıqyzyl jalaýy» festıvali ótti. Munda jas sýretshiler, qolóner sheberleri óz týyndylaryn kópshilikke kórsetti. Marhabat aǵanyń týǵan jeri – Pisteli aýylynda ótetin «Taýpisteli taǵylymy» jobasy qos býyn arasynda urpaqtar sabaqtastyǵynyń ornaýynda úlken ról atqaryp keledi. Týǵan jerdi túletýde Marhabat aǵanyń sińirgen eńbegi ushan-teńiz. Qaı iste bolsyn, biz árqashan jazýshy aǵamyzǵa arqa súıep júremiz», - degen aýdan ákiminiń orynbasary jazýshyǵa uzaq ǵumyr tilep, syı-qurmet kórsetti. Sonymen qatar, túlkibastyq aqyn, Marhabat aǵanyń qulyn-taıdaı tebisip ósken synyptasy Ábdibek Aralbaıuly qurdasyna arnaý óleń oqyp berdi. Marqasqa aqyn Narmahan Begaly Marhabat Baıǵuttyń shyǵarmashylyq erekshelikterine toqtaldy. Al, ardager jýrnalıst Baıdýlla Qonysbek Marhabat Baıǵutpen «Ońtústik Qazaqstan» gazetinde etene jaqyn aralasqanyn esine aldy. О́z kezeginde jazýshy Marhabat Baıǵut qonaqtarǵa rızashylyǵyn jetkizip, qazirgi oqyrmandar týraly oı qozǵady. «Qazir bizdiń jazǵandarymyzdy eshkim oqymaıtyn shyǵar dep oılaıtynmyn. «Oqymaıdy» dep te renjimeımin. Biraq, olaı emes eken. Izdep júrip oqıtyndar bar sekildi. Byltyr Aqtóbeden Álıhan degen 23 jastaǵy jigit meni izdep Shymkentke keldi. Ol meniń bir maqalamdy oqyp qalyp sodan meni izdepti. Kitap surap kelgen oǵan úıdegi 3 tomdyq kitabymdy berip jiberdim. Osyndaı oqyrmandardyń bary qýantady», - dedi jazýshy.