* Qazaqstanda 1 qyrkúıekte 250 myńnan astam bala birinshi synypqa barady. Sonyń ishinde Astana qalasynda bilim mekeni tabaldyryǵynan birinshi ret attaıtyn búldirshinder sany 12 myńǵa jýyqtaıdy.
*Qyzylorda oblystyq prokýratýrasy jyl basynan beri tabıǵatqa keltirilgen zııany úshin 2 mlrd. 666 mln. teńgeni memleketke qaıtardy. Aımaq quqyq qorǵaýshylary buǵan 42 tekserýdiń qorytyndysynda 46 usynys pen 12 narazylyq keltirý arqyly qol jetkizdi.
*Pavlodar oblysyndaǵy Ekibastuz qalasynda 15 medısına qyzmetkerine páterler kiltteri tapsyryldy. Rásimge qatysqan oblys ákimi Erlan Aryn qaıta qalpyna keltirilgen qyzmettik úıde jalpy 55 páter bar ekenin aıta kelip, qalǵandaryna memlekettik qyzmetkerler men quqyq qorǵaý salasynyń mamandary ornalasatynyn jetkizdi.
*Ońtústik Qazaqstan oblysynda 1 mln. tonna aýyl sharýashylyǵy ónimderi jınaldy. Bulardyń qatarynda kókónis, kartop jáne baqsha daqyldary bar. Kósh basynda 140 myń tonnalyq kórsetkishpen Saryaǵash aýdanynyń dıqandary keledi.
*Aqyn, jazýshy Aqylbek Shaıahmet Qostanaı qalasynyń qurmetti azamaty atandy. Uzaq jyldar boıy óńirdiń rýhanı salasyn kóterýge atsalysyp kele jatqan azamatty bul ataqqa A.Baıtursynov atyndaǵy QMÝ rektoraty men ǵylymı keńesi usynsa, oǵan qalalyq máslıhat depýtattary qoldaý kórsetti.
*Jyl basynan beri Aqtaý qalasynda 64,9 mlrd. teńgeniń ónerkásip ónimderi shyǵaryldy. Budan basqa, 7 088, 8 mln. teńgeniń qurylys jumystary oryndaldy. Bul derekterdi qala ákimi Edil Jańbyrshın máslıhatta bergen esebinde keltirdi.
* Keshe Shyǵys Qazaqstan oblysy Besqaraı aýdanyndaǵy Qaramyrza aýylynda mádenıet úıi ashyldy. Bul kóp jyldar boıy qańyrap bos turǵan ǵımaratty kúrdeli jóndeýden ótkizip, qaıta jańǵyrtý arqyly júzege asyryldy.
«QazAqparat», «Qazaqstan jańalyqtary», Bnews.kz, TengriNews, EgemenNews habarlary boıynsha daıyndaldy.
