U.Álipov bul jumystarǵa el kólemi boıynsha jumyldyrylǵan arnaıy tehnıkalardyń sanyna toqtalyp, jýyrda qalaaralyq qaı baǵyttarǵa ruqsat beriletinin atap ótti.
– Qosshy, Qorǵaljyn baǵytyndaǵy joldar ashyldy. Keshke deıin elordadan Býrabaıǵa, Qaraǵandyǵa qatynaıtyn joldardy tazalap bitiremiz. Erteń Qostanaı, Pavlodar baǵytyndaǵy joldar tazalanady. Pavlodar baǵytyndaǵy jolda jumys aýqymy óte kóp. Ereımentaý aýmaǵynda qar qalyń tústi. Osylaısha erteń keshke deıin elordadan qatynaıtyn barlyq baǵyttaǵy joldardy tazalap bitiremiz dep josparlap otyrmyz, – dedi U.Álipov.
Onyń aıtýynsha, Aqmola oblysy boıynsha joldardy qardan tazartýǵa barlyǵy 105 arnaıy tehnıka men 300-ge jýyq adam jumyldyrylsa, el aýmaǵyndaǵy tehnıka sany 800-ge jýyqtap otyr.
U.Álipov qarly boran qaharyna mingen ótken jeksenbi kúni Býrabaıdan Nur-Sultanǵa qatynaǵan biraz kólik qar qursaýynda qalǵanyn aıtty. Ile-shala «QazAvtoJol» UK» AQ qyzmetkerleri Ishki ister mınıstrligi Tótenshe jaǵdaılar komıtetiniń qyzmetkerlerimen birlese otyryp, atalǵan qurylymdardyń arnaıy tehnıkalary jolda qalǵandardy bastap elordaǵa jetkizgen. Avtokólikter leginde bas-aıaǵy 500-ge jýyq avtokólik bolǵan.
