Laýra Kenjına jetekshilik etetin Qazaqstan Respýblıkasy Ulttyq Iаdrolyq ortalyǵyndaǵy Radıasııalyq qaýipsizdik jáne ekologııa ınstıtýtynyń qyzmetkerleri únemi ózderiniń jetistigimen erekshelenedi. Olardyń bıodozımetrııalyq jáne epıdemıologııalyq zertteýler toby halyqaralyq deńgeıde tájirıbelik yntymaqtastyqty damytyp, iske asyrýda. Sondaı-aq ǵylymı tehnologııalar men ınnovasııalardyń qaýipsizdigine baılanysty ǵylymı áleýetti qurý arqyly NATO elderi men áriptes elder arasyndaǵy dıalogty keńeıtýge yqpal etýde.
Granttyń tusaýkeseri Brıýsseldegi NATO-nyń shtab-páterinde ótti. Aıta ketý kerek, NATO-nyń negizgi basym baǵyty men strategııalyq mindetteriniń biri – hımııalyq, bıologııalyq, radıologııalyq jáne ıadrolyq soǵysty boldyrmaý. Ǵylymı zertteýler NATO elderiniń birneshe ǵylymı-zertteý mekemesimen, atap aıtqanda, Italııanyń eki ınstıtýtymen jáne Horvatııa ınstıtýtymen ózara áriptestikte júzege asyrylatyn bolmaq.
Grant sheńberinde radıasııalyq oqys oqıǵalarǵa baılanysty tótenshe jaǵdaılarǵa daıyn bolý máselesi josparlanýda. Adam densaýlyǵyna zııan keltiretin saldardyń aldyn alý úshin erterek jáne jyldam áreket etý mańyzdy. Bul is-sharalar Atom energııasy jónindegi halyqaralyq agenttik pen Dúnıejúzilik densaýlyq saqtaý uıymy bekitken qaýipsizdik talaptarynyń ajyramas bóligi bolyp tabylady.
Josparlanǵan granttyń is-sharalaryna sáıkes 3 jyl boıy qazaqstandyq mamandar Eýropanyń jetekshi zertteý ortalyqtarynda oqytylatyn boldy.
Cemeı-Kýrchatov
