Osydan birer kún buryn AQSh tarapy Izraıl men Palestınany beıbitshilikke shaqyrýǵa negizdelgen kelisim jobasynyń ázirlemesi aıaqtalǵanyn málimdegen bolatyn. Bul joba Taıaý Shyǵysta uzaq jylǵa sozylǵan shıeleniske toqtaý salýy tıis edi. D.Tramptyń aıtýynsha, jospar – Palestına memleketin qurýdy kózdeıdi. Sondaı-aq palestınalyqtardyń ıeligindegi jer aýmaǵy qazirgisinen eki ese úlken bolmaq. BUU-ǵa múshe 193 eldiń 137-si azattyǵyn moıyndaǵan jartylaı táýelsiz memleket úshin bul úlken múmkindik-tuǵyn. Alaıda taraptardyń sońǵy kelisimge kelýin kózdeıtin kelissózder barysy tórt jylǵa sozylýy yqtımal.
Túrkııa Radıo-Teledıdar mekemesi resmı saıtynyń habarlaýynsha, AQSh ákimshiligi Izraıl men Palestına arasyndaǵy beıbitshilik kelissózderiniń qaıtadan bastalýy úshin daıyndyqtardyń jalǵasqanyn jetkizgen. Alaıda Palestına prezıdenti Mahmýd Abbas «ǵasyr kelisimine» arab elderiniń kóshbasshylary da qarsy ekenin aıtyp, Fatıh qozǵalysynyń Ramallahtaǵy ortalyq komıteti jınalysynda bul kelisimdi qabyldaýǵa bolmaıtynyn túsindirdi.
«Arab baýyrlarymyz bizge «ǵasyr kelisimine» qarsy ekenin aıtty», degen M.Abbas, Eýropa, Azııa jáne Afrıkadaǵy keıbir elderdiń de kelisimdi qabyldamaıtynyn alǵa tartty.
Túrkııa tarapy da bul kelisimdi tolyqtaı qoldap otyrǵan syńaı tanytpaıdy. Atalǵan eldiń Syrtqy ister mınıstrligi «ǵasyr kelisimin» «ólitýǵan» dep baǵalap, jospar eń aldymen Izraıl Palestınanyń jer aýmaǵyn basyp alýdy kózdeıtinin, sondaı-aq onda turyp jatqan palestınalyqtardyń quqyǵyn buzatynyn jetkizgen edi.
Birer kósheniń jabylǵany bolmasa, Túrkııanyń ıslamıstik partııa ókilderiniń sherýine memleket tarapynan qandaı da bir tosqaýyl bolmady. Sherýge shyqqandar D.Tramp usynǵan kelisim men saıasatty synǵa alyp, Shyǵys Ierýsalımdi «Palestınanyń astanasy» dep urandatty.
AQSh prezıdenti usynǵan kelisimde palestınalyq bosqyndardyń Izraıl aýmaǵyna qatynaýdan bas tartýy týraly talap bar. Bul rette Palestına men Izraıldiń birlesken ókimi arqyly palestınalyq bosqyndarǵa ótemaqy berý boıynsha qor qurý máselesi de qarastyrylýda. Biraq qordy qarjylandyrý kózi áli anyqtalmaǵan.
