Jalǵyzilikti ananyń alǵysyna bólendi

Qańtardaǵy qarly boran Qazaq­stannyń birneshe aımaǵyndaǵy tur­ǵyndardy ábigerge salǵany belgili. Osyny eskergen elorda jastary joǵaryda atalǵan aksııany qolǵa alyp, ony Memleket basshysy Qasym-Jomart Toqaev, óner, sport juldyz­dary qoldaǵan edi. Igi bastamany Nur-Sul­tandaǵy volonterler de jalǵas­tyrýda. Oǵan óz kózimizben kýá boldyq.

– О́zderińiz kórip otyrǵandaı, qar bıyl qalyń jaýdy. Tıisinshe bizdiń volon­terler de beı-jaı qarap otyra almady. Kómekke muqtaj jandar týraly aqparatty Nur-Sultan qalasyna qarasty aýdandyq ákimdikten alyp otyrmyz. Osy kúni biz elorda aýmaǵyndaǵy Almaty, Saryarqa, Baı­qońyr jáne Esil aýdandaryndaǵy múm­kin­digi shekteýli jandardyń, kóp ba­laly jáne jalǵyzbasty analardyń, qarııa­lardyń ótinishi boıynsha barly­ǵy 200 jeke turǵyn úı aýlasynda qar tazaladyq, – deıdi «Astana jasta­ry» jastar resýrstyq ortalyǵy basshy­synyń orynbasary Aqerke Aqtaı.

Onyń aıtýynsha, resýrstyq ortalyqtaǵy volonterler bazasynda 2000-ǵa jýyq azamat tirkelipti. Onyń ishinde belsendi degeni 200-ge jýyqtaıdy. Solardyń kómegimen bas-aıaǵy 48 myń sharshy metr qar tazalanypty. Jalpy, qańtar aıynan bas­tap qolǵa alynǵan aksııany qalalyq ákimdikpen qatar, Tursynbek Qabatov, Aıgúl Imanbaeva, Ashat Sadyrbaı, Ádil Ahmetov syndy ónerpazdar, sportshylar qoldap otyr. Al Volonter jylyna dóp kelgen «Biz birgemiz!» aksııasyna el kóleminde 50 myńǵa jýyq azamat atsalysqan eken. 

– Jalǵyzbasty anamyn. Bala­baq­shada jetekshi bolyp eńbek etemin. Alpysty alqymdaǵan anam jáne eki baldyrǵanym úsheýimiz turamyz. Tazalaýǵa qaýqarym bolmaǵan soń, Nur-Sultan qalasyndaǵy Saryarqa aýdanynyń ákimi Erǵalı Qýandyqulyna ótinish jazdym. Ákimdikten ile-shala Baqtııar esimdi azamat habarlasyp, bir apta muǵdarynda kómek kórsetiletinin jetkizdi. Endi mine jastar jabyla ketip, aýlamdy qardan tazartýda. Qol ushyn sozǵan barsha azamattarǵa alǵysymdy bildiremin, – deıdi úı ıesi Marjan Ahmetjanova.

Bul joly jalǵyzbasty ananyń
aýlasyn tazalaýǵa 20-ǵa jýyq volonter nıet bildiripti. Basym bóligi JOO, kolledj stýdentteri.

– «Asý» gýmanıtarlyq-tehnıkalyq kolledjiniń 1-kýrs stýdentimin. Birde kolledj basshysy volonterler qataryna qosylýǵa bolatynymyz týraly aıtyp, barynsha qoldaý bildiretinin jetkizdi. Men bul usynysty qabyl aldym. Osylaısha volonterler qataryna qosyldym. Bul sheshimime dán rızamyn. Sebebi muqtaj janǵa qol ushyn sozý – men úshin úlken baqyt. Qoldan kelgen kómegimdi aıamaımyn, – dedi volonter Jasulan Kamalov.

Volonterler tazalaǵan qar Sary­arqa aýdandyq ákimdigimen birlese otyryp, arnaıy tehnıkamen qala syrtyna shyǵarylady.