Rýhanııat • 05 Aqpan, 2020

Talonda – tarıhı tulǵalar

965 ret

kórsetildi

1 mın

oqý úshin

Batys Qazaqstan oblysynyń Jánibek aýylynda ótken qańtar aıynda «Batys Alga» atty janarmaı quıý beketi ashylǵan bolatyn. Jańa bekettiń talondarynan bıyl mereıtoıy toılanatyn tarıhı tulǵalardyń sýretin kórip, súısinip qaldyq.

Qazbek QUTTYMURATULY

- Bul ıdeıany Jánibek aýdandyq kásipkerlik jáne aýyl sharýashylyq bóliminiń basshysy Arman Isqaqovpen aqyldasyp, dızaınyn kelisip jasadyq. Eń sońynan óz atam - «Batys Alga» jeke kásipkerliginiń ıesi Temirhan Álipqalıevke unaǵan nusqaǵa toqtap, basyp shyǵardyq, - deıdi kásipkerdiń nemeresi Eldar Oralhanuly.

Jánibektegi jańa janarmaı beketi talonymen ǵana emes, taýar baǵasymen de eldiń kóńilinen shyǵyp tur. О́ıtkeni oblys ortalyǵynan 600 shaqyrymdaı qashyqta jatqan bul óńirde kez kelgen qyzmet te, taýar baǵasy da aspandap ketetini belgili.

- Buryn bizdiń aýylda kóp jyldar boıy jalǵyz janarmaı beketi jumys istedi. Balamasyz bolǵan soń, ondaǵy benzın baǵasy da qymbat bolatyn. «Batys Alga» ashylǵaly aýylda AI-92 benzıniniń baǵasy lıtrine 185 teńgeden 160 teńgege tústi. Ár lıtrge 25 teńge arzandady. Bul jergilikti turǵyndar úshin úlken kómek qoı, - deıdi Arman Isqaqov.

Batys Qazaqstan