Olar qarda júrgish «Yamaha» jyldam kóligimen tabıǵattyń kórki - sulý elikterdi qýyp júrip atqany belgili boldy. Brakonerlerdiń júk salǵyshtarynan bir jáne aǵashqa ilip, músheleı bastaǵan ekinshi eliktiń eti tabyldy. «Sibir eligi» dep atalatyn bul janýarlardy barlyq asha tuıaqtylarmen birge birinshi qańtardan bastap atýǵa zańmen qatań tyıym salynǵan edi. О́ıtkeni bul kezeńnen janýarlardyń tóldeýge daıyndalatyn kezeńi bastalady.
Biraq ashkóz brakonerler zańdy da, tabıǵattyń kórkin de aıaqqa basyp, sulý elikterdi qyzyl qanǵa boıaǵan. О́rkenıeti joǵary damyǵan eýropalyq elderde mundaıǵa asa aýyr jazalar belgilengen. Al bizde zańsyz ań aýlaýdy jazalaý jónindegi zańnamaǵa ústimizdegi jyldyń 11 qańtarynan bastap engizilgen qatańdatý ózgeristeri men tolyqtyrýlarǵa sáıkes úsh myń AEK kóleminde aıyppul salynady. Buryn bul jaza bar bolǵany 160 AEK kólemindegi aıyppulmen nemese 40 táýlikke deıingi bas erkinen aıyrý jazasymen shektelgen edi. Endi bas erkinen aıyrý jazasy 3 jylǵa deıin uzartyldy.
Qazir ań aýlaý zańnamasyn buzǵan Petropavl qalasynyń otyz bes jasar turǵynyna qarsy sotqa deıingi tergep-tekserý sharalary júrgizilip jatyr. Odan qylmys ornynan alynǵan eki eliktiń eti, esepke qoıylmaǵan qarda júretin kóligi, 12 kalıbrli tegis uńǵyly «IJ» myltyǵy, ańshy pyshaǵy, sondaı-aq, oq-dáriler alynǵan. Sonymen birge onyń janyndaǵy adamnyń qylmysqa qatystylyǵy tekserilýde deıdi oblystyq Polısııa departamentiniń baspasóz qyzmeti. Ańda birge júrgen adamnyń «ań aýlaýǵa qatystylyǵy anyqtalýda» degenniń ózi kúmándi oılar týdyratyny sózsiz...
«Bul - jyl basynan beri anyqtalǵan zańsyz ań aýlaýdyń 5-shi, al «Brakoner» jedel-profılaktıkalyq is-sharasy kezinde anyqtalǵan 4 fakti bolyp otyr, - deıdi Polısııa departamentiniń Jergilikti polısııa qyzmeti basqarmasy tabıǵatty qorǵaý polısııasy tobynyń aǵa ınspektory, polısııa kapıtany Ashat Qojabaev. – Urǵashy eliktiń býaz ekendigin anyqtaý úshin múshelengen et saraptamaǵa jiberildi, bul salynatyn aıyppul kólemin anyqtaıtyn faktorlardyń biri».
Soltústik Qazaqstan oblysy
