Mańǵystaý oblysynyń mádenıet jáne óner uıymdary 2019 jyly birqatar iri mádenı-kópshilik shara ótkizdi. Atap aıtsaq, Qazaqstannyń Eńbek Eri, halyq jazýshysy Á.Kekilbaıulynyń 80 jyldyq mereıtoıy keń kólemde atalyp ótti. Shara barysynda Qazaqstan Prezıdenti Q.K. Toqaevtyń qatysýymen Ábish Kekilbaev atyndaǵy Mańǵystaý oblystyq tarıhı-ólketaný mýzeıi men Ábish Kekilbaıuly eskertkishi saltanatty túrde ashyldy.
Á.Kekilbaıulynyń 80 jyldyǵyna arnalǵan ádebıet jáne óner qaıratkerleriniń halyqaralyq kongresi, sondaı-aq birinshi halyqaralyq «ABISH ALEMI» teatr festıvali uıymdastyrylyp, oǵan Armenııa, Grýzııa, Iran, О́zbekstan, Túrkmenstan, Tájikstan, Túrkııa jáne Qazaqstandyq teatr ujymdary belsendi qatysty.
«Mańǵystaýdyń tarıhı-mádenı muralaryn zertteýdegi jańa kózqarastar men perspektıvalar» halyqaralyq ǵylymı-praktıkalyq konferensııasy Ulybrıtanııa (Oksford ýnıversıteti), Ázirbaıjan, Iran, Reseı, Túrikmenstan, О́zbekstan elderinen kelgen ǵalymdar men mamandardyń basyn qosty. Barlyǵy 100-ge jýyq qatysýshy jınaldy.
«Qyrymnyń qyryq batyry» Qazaq halqynyń teńdessiz epopeıalyq shyǵarmasy men ony osy zamanǵa tolyq jetkizýshi, dańǵaıyr jyraý Muryn Seńgirbekulynyń esimin keńinen nasıhattaý maqsatynda jyraýdyń 160 jyldyǵyna arnalǵan «Muhıttan qalmysh teńiz-jyr» respýblıkalyq jyrshylar konkýrsy ótti.
Mańǵystaýda 14 naýryzda toılanatyn Amal merekesi Elbasynyń «Bolashaqqa baǵdar: Rýhanı jańǵyrý» baǵdarlamasy aıasynda ekinshi jyl respýblıkalyq deńgeıde atalyp ótti. Sharaǵa Aqmeshitten, Saraıshyq kesenesinen, О́zbekstannan, Ichankala memorıaldyq kesheninen, Horezm oblysynan jáne Noǵaı elinen kelgen qonaqtar men Qazaq Ulttyq mádenıet ortalyǵynyń ókilderi belsene atsalysty. 50-den astam kıiz úı tigilip, 200-den astam ónerpaz óner kórsetti. Sondaı-aq, ulttyq sport oıyndarynan jarystar ótkizilip, alaman báıge uıymdastyryldy.
