Sýret: nippon.com
Stalkıng – jábirlenýshiniń erkine qaıshy baılanys ornatýǵa nemese ańdýǵa baǵyttalǵan, zorlyq-zombylyqpen baılanysy joq, biraq eleýli zııan keltirgen áreketter. Bul qylmystyń jazasy 200 AEK-ke deıingi aıyppul, sol mólsherde túzeý jumystary, 200 saǵatqa deıin qoǵamdyq jumys nemese 50 táýlikke deıin qamaý bolyp belgilengen bolatyn. Iаǵnı áldebir adamnyń izine túsip, tynymsyz mazalap, telefon shalyp, tipti ol qalamaǵan syılyqtar jiberip, qorqytyp-úrkitip, sonyń ishinde ǵalamtor arqyly da mazalaı bergen adam jaýapqa tartylady.
Batys Qazaqstan oblysynyń ishki ister organdary óńirdegi stalkıng qylmysynyń alǵashqy áreketin Bórli aýdanynda tirkedi. Aqsaı qalasynyń turǵyny polısııaǵa burynǵy tanysy tarapynan júıeli túrde qýdalaý men qorqytýǵa ushyraǵany týraly aryzdanǵan. Ekinshi oqıǵa Bókeı ordasy aýdanynda bolǵan. Tergeý oryndary anyqtaǵanyndaı, 2025–2026 jyldar aralyǵynda er adam burynǵy jubaıyn júıeli túrde qýdalap, oǵan áleýmettik jeli arqyly qorqytý sıpatyndaǵy jazbalar jibergen. Bókeı ordasy aýdandyq soty onyń bul áreketin jábirlenýshige eleýli psıhologııalyq zııan keltirgen dep taýyp, zań aıasynda jaýapqa tartty.
Stalkıng boıynsha alǵashqy úkimniń jaı-japsaryn tolyǵyraq bilý úshin Batys Qazaqstan oblystyq sotynyń baspasóz hatshysy Nurgúl Qanatbaevaǵa habarlasqan edik.
– Bórli aýdandyq soty Qylmystyq kodekstiń 115-1-babynda kózdelgen zańsyz qýdalaý faktisi boıynsha úkim shyǵaryp, sottalýshy D.-ǵa 80 aılyq eseptik kórsetkish mólsherinde, ıaǵnı 346 000 teńge kóleminde aıyppul túrindegi jaza taǵaıyndady, – deıdi oblystyq sot ókili.
Oqıǵa bylaı bolǵan eken: Aqsaı qalasynda turatyn bir jigit 2025 jylǵy 20 qyrkúıekten 2026 jylǵy 23 qańtarǵa deıingi aralyqta qyz balaǵa birneshe márte telefon soǵyp, habarlama jibergen. Sonyń ishinde qorqytý sıpatyndaǵy habarlamalar da bolǵan. Tipti jábirlenýshiniń turǵylyqty jáne jumys ornyna baryp, sol jerde syrtynan ańdyp kútken. Oqıǵa tipti nasyrǵa shaýyp, 2026 jylǵy 23 qańtarda ańdyp júrip, dúkennen shyqqan jábirlenýshiniń qolynan erkinen tys ustap, qardyń ústine qulatqan. Abyroı bolǵanda kómek suraǵan daýysqa qyzdyń áriptesteri kelip, qutqaryp qalǵan. Dál osy ýaqytta jigit mas kúıinde bolǵan eken.
Osy isti qaraǵan Bórli aýdandyq soty bul jigittiń áreketin «jábirlenýshige eleýli zııan keltirgen zańsyz qýdalaý» dep tapty. Qylmystyq isti qaraý barysynda sottalýshy kinásin tolyq moıyndady. Prokýror sottalýshyǵa 80 saǵat qoǵamdyq jumys taǵaıyndaýdy surady.
Sot er adamnyń áreketi uzaq ýaqytqa sozylǵanyn, bul arqyly jeke adamnyń Qazaqstan Konstıtýsııasy kepildik bergen negizgi bostandyǵyna qol suǵylǵanyn atap ótip, is boıynsha jınalǵan dálelder negizinde ony kináli dep tanydy.
Nátıjesinde, sottalýshyǵa joǵaryda aıtylǵandaı 80 aılyq eseptik kórsetkish mólsherinde aıyppul túrindegi jaza taǵaıyndaldy.
Batys Qazaqstan oblysy
