Esepti jıynǵa qatysqan bir myńnan astam turǵynnan bólek, shymkenttikter qala basshysynyń esebin qala ákimdiginiń resmı saıty men áleýmettik jelidegi facebook paraqshasynda júrgen tikeleı efır arqyly da tyńdady.
О́tken jyly qalada birshama jumystar atqarylǵanyn aıtqan qala ákimi josparly ındıkatorlarǵa qol jetkizilgenine toqtalyp ótti. Máselen, ónerkásip ónimi 2018 jylmen salystyrǵanda 15 paıyzǵa ósse, aýyl sharýashylyq ónimi 6,3 paıyzǵa, jańa turǵyn úıler 19,2 paıyzǵa, al, bólshek saýda 7,1 paıyzǵa artqan.
«Respýblıka boıynsha ındýstrıaldy-ınnovasııalyq damý baǵdarlamasy iske asyrylýda. Baǵdarlama aıasynda Shymkentte 3 jylda 24 kásiporyn ashylyp, 1300 turaqty jumys orny paıda boldy. Al, ótken jyly «Alıans» kompanııasynyń jip ıirý fabrıkasy qaıta iske qosyldy. Ol birneshe jyldan beri toqtap turǵan edi. Qalada 2 ındýstrııaldy aımaq tıimdi jumys isteýde. Qazirgi tańda, 64 mlrd.teńge ınvestısııalar tartylyp, 72 joba iske qosyldy. Osynyń esebinen 4 myńnan astam adam jumyspen qamtylyp, bıýdjetke 13,4 mlrd.teńge salyq tústi» dedi M.Áıtenov.
О́z baıandamasynda Murat Dúısenbekuly aldaǵy 3 jylda sheteldik ınvestorlardyń qatysýymen keminde 15 joba iske asyrylyp, oǵan 2,5 mlrd. AQSh dollary kóleminde sheteldik ınvestısııa tartylatynyna toqtalyp ótti. Nátıjesinde 2 myńnan astam turǵyn jumyspen qamtylatyn bolady. Aýylsharýashylyǵy salasynda atqarylǵan jumystarǵa toqtalǵan ákim ótken jyly atalǵan salamen 29 mlrd.teńgeniń ónimi óndirilgenin málim etti. Onyń aıtýynsha, salaǵa sońǵy 3 jylda 2,6 mlrd. teńge ınvestısııa salynyp, 56 gektar jerge jylyjaı jáne 215 gektar jerge qarqyndy baý egilgen. Al, etke 24 myń bas iri qara bordaqylanyp, 111 januıalyq sút fermasy ashylǵan. Bul maqsatqa bıýdjetten 3 mlrd.teńge sýbsıdııa tólengen.
