Keńes barysynda M-36 «RF shekarasy (Ekaterınbýrg) – Almaty» 2453-2446 shaqyrym» avtojolyn Shamalǵan stansasynyń temirjol ótkelinde jol ótpesin ornata otyryp, qaıta qurý máselesi talqylandy. Atalmysh joba boıynsha ótken jyldyń jeltoqsanyn aıynda «Todını Konstrýsıonı Djeneralı S.p.A.»/ «Integra Construction KZ» JShS konsorsıýmymen kelisimshartqa qol qoıylǵan bolatyn. Qurylys-montajdyq jumystar 2019 jyly bastaldy. Qazirgi tańda jobalaý-izdestirý jumystary júrgizilip jatyr. Jıyn barysynda qurylysty ýaqytyly aıaqtaý, aǵymdaǵy jyldyń sońyna deıin avtomobıl jolynyń atalmysh ýchaskesinde jol qozǵalysyn qamtamasyz etý tapsyryldy.
Sonymen qatar «Almaty-Bishkek» avtomobıl jolynyń 16-19 shaqyrymyndaǵy «Altyn Orda» jáne 18-19 shaqyrymdaǵy «Asyl Arman» turǵyn úı kesheni aýdanyndaǵy ýchaskesin kúrdeli jóndeýden ótkizý jumystarynyń barysy qaraldy. «Altyn Orda» bazary 16-19 shaqyrym ýchaskesindegi jumystar 2020 jyldyń jeltoqsanynda aıaqtalmaq. Búgingi tańda nysanda qurylys materıaldaryn daıyndaý jumystary júrgizilýde.
«Asyl Arman» TK aýdany 18-19 shaqyrym ýchaskesindegi kúrdeli jóndeý jumystary 2019 jyldyń jeltoqsanynda bastaldy. Joba aıasynda túrli deńgeıde uzyndyǵy 550 metr bolatyn tórt jolaqty qozǵalysty uıymdastyrý arqyly kóliktik jol aıyryǵy men jaıaý júrginshilerge arnalǵan 1 jerústi kópiriniń qurylysy qarastyrylǵan.
Keńeste «Almaty-Bishkek» avtojolyn («Altyn Orda» bazary 16-19 shaqyrym) kúrdeli jóndeýden ótkizý jobasynyń iske asyrylýyn erekshe baqylaýǵa alý jáne jobany belgilengen merzimde aıaqtaý týraly sheshim qabyldandy.
Budan bólek, shara aıasynda «Uzynaǵash-Otar» avtomobıl jolyn rekonstrýksııadan ótkizý jumystarynyń barysy talqylandy. Uzyndyǵy 96 shaqyrymdy quraıtyn joldy rekonstrýksııalaý jobasy 2022 jylǵa deıin aıaqtalady dep josparlanyp otyr.
