Bıylǵy baıqaý 11-14 aqpan aralyǵynda Almaty qalasy ál-Farabı atyndaǵy Qazaq ulttyq ýnıversıtetiniń bazasynda ótti. Osy baıqaýǵa Semeı qalasyndaǵy fızıka-matematıka baǵytyndaǵy Nazarbaev Zııatkerlik mektebinen qatysqan 12-inshi synyp oqýshysy Ulan Seıitqalıev óziniń kompıýterlik jáne fızıkalyq modelder arqyly tabıǵı jáne vırtýaldy ortalyq kúshterdiń zańdylyqtaryn zertteýge arnalǵan ǵylymı jobasymen 1-shi oryndy, 11 synyp oqýshylary Bek Qadesov pen Álisher Rymqannyń birlese jasaǵan onkoterapııada qoldanylatyn altyn nanobólshekterdiń qurylymyn zertteýge arnalǵan ǵylymı jobasy 2-shi oryndy jeńip aldy. Eske salar bolsaq, jaqynda joba avtorlary men jetekshisi onkoterapııada qoldanýǵa arnalǵan altyn nanobólshekterdiń qurylymyn zertteýge arnalǵan avtorlyq jumystary úshin sertıfıkatqa ıe bolǵan bolatyn. Shákirtterimiz jeńiske jetý jolynda tynymsyz eńbektengendikterin atap ótýimiz kerek, deıdi Ermek Isabaev.
Respýblıkalyq ǵylymı jobalar baıqaýy - bul «Qazaqstan-2050» strategııasy aıasyndaǵy respýblıkanyń ekonomıkalyq, áleýmettik jáne mádenı damýynyń modelderi» taqyrybyndaǵy mektep oqýshylarynyń ǵylymı zertteý baıqaýy. Bıyl jas zertteýshiler: «Ǵylymı-tehnıkalyq progress ekonomıkalyq ósýdiń negizgi býyny retinde», «Ekonomıkalyq jáne áleýmettik prosesterdi matematıkalyq modeldeý», «Taza tabıǵı orta – «Qazaqstan-2050» strategııasyn iske asyrýdyń negizi jáne «Qazaqstannyń tarıhı eskertkishteri jáne perspektıvaly týrıstik marshrýttar» taqyryptary boıynsha tórt baǵytta baq synasty. Baıqaýdyń birinshi mektepishilik kezeńinde 21604 oqýshy qatysty. Ekinshi aýdandyq kezeńde - 7332, úshinshi oblystyq kezeńde - 3381 oqýshy óz bilimderin tekserdi. Saıystyń qorytyndy kezeńine 737 jas zertteýshilerdiń 587 ǵylymı joba usynyldy.
