Elimizde mundaı maqsatty alǵa qoıyp, naqty nátıjelerge qol jetkizip júrgen áleýmettik qurylymdar joq emes. Solardyń biri, tipti biregeıi «Altyn orda» avtorlyq dızaın úıiniń negizin qalaýshy, ári onyń qazirgi jetekshisi Yrza Tursynzada bolyp otyr. Ol «Analar amanaty» atty áleýmettik baǵdarlamanyń bólinbes bir bólshegi «Kórpe FEST» jobasyn júzege asyrý isiniń bel ortasynda keledi.
– Bizdiń basty maqsatymyz – kóp balaly jáne turmysy tómen, sonyń ishinde dástúrli emes dinı aǵymdardyń jeteginde júrgen áıelderdiń kásip ashýyna qoldaý kórsetip, tıisti baǵyt-baǵdar berý. Kórpe-jastyq tigý isinde áıel zatynyń ıkemi men múmkindigi joǵary ekeni kúndelikti turmysta áldeqashan dáleldengen. Olardyń boıynda ejelden qalyptasqan osy úrdistiń shoǵyn úrleı bilse, onyń nátıjesi kóp keshikpeı keletinine bás tigýge bolady. Sondyqtan biz «Analar amanaty»
jobasyna sáıkes el óńirlerine shyǵyp, tigin jáne qoldanbaly óner túrleri boıynsha tegin sabaqtar men semınarlar jáne sheberlik sabaqtary men kórmeler ótkizýdi qajet dep taptyq. Ári osy baǵdarlama aıasynda motıvasııalyq derekti fılmder kórsetiledi. Bul baǵyttaǵy keıingi is-sharamyz Aqtóbe qalasynda ótkizildi, – dedi bul jóninde joba jetekshisi.
Kelesi kezekte ol budan tórt jyl buryn «Altyn orda» JShS jáne «Adamdardyń ejelgi jetistikteri» qoǵamdyq qorynyń bastamasyna sáıkes qolǵa alynǵan joba Eńbek jáne halyqty áleýmettik qorǵaý mınıstrligi men birqatar oblystyq ákimdikter tarapynan qoldaý tapqanyna toqtalyp ótti. Atap aıtqanda, kóp balaly analarǵa jáne halyqtyń áleýmettik osal toptaryndaǵy áıelderge arnalǵan aqysyz sheberlik sabaqtary buǵan deıin Nur-Sultan men Almaty qalalarynda jáne Mańǵystaý, Atyraý, Qaraǵandy oblystarynda ótkizilgen.
– О́zińiz bastaǵan otandyq qolóner sheberleriniń joǵaryda atalǵan óńirlerden keıingi sapary Aqtóbege túsýiniń syry nede? – dedik biz Yrza Tursynzadaǵa.
– О́ńirdegi qyz-kelinshekter men analar bizdiń jobamyzǵa áleýmettik jeli arqyly qanyq ekenin jetkizip edi. Aqtóbede «Kórpe FEST» mega festıvalin ótkizý jónindegi oı osydan týdy. Jalpy, buǵan deıin de Aqtóbege jolym túsken kezde mundaǵy zamandas qurbylarymyz ben sińlilerimizdiń qolónerge degen qyzyǵýshylyǵy joǵary ekenin baıqaǵanmyn. Onyń ústine oblys basshysy Ońdasyn Orazalın mega festıvaldy ótkizý isine qoldaý kórsetýge ázir ekenin bildirdi, – dep Yrza hanym yrzalyq tanyta jaýap qaıtardy.
Úsh kúnge sozylǵan «Kórpe FEST» mega festıvali kezinde 300-den astam aqtóbelik áıelder tigin óneriniń qyr-syryn tegin úırenýge múmkindik alǵany aıtýǵa turarlyq is, kóńil qýantarlyq jetistik. Sondaı-aq ulttyq qolónerdi qaıta jańǵyrtýǵa arnalǵan basqosýdyń jabylý rásimi kezinde oblys ákimdigi atynan 35 kóp balaly ana men turmysy tómen otbasyndaǵy altyn qazyq ókilderine 35 tigin mashınasynyń syıǵa tartylýy da atalǵan jobany qoldaýdyń kelisti kórinisi bolmaq.
Buǵan qosa «Altyn orda» avtorlyq dızaın úıi de kórpe-jastyq tigýge ıkemi bar názik jandardy yntalandyrýdy nazardan tys qaldyrmady. Sóıtip olarǵa ulttyq qolóner tehnologııalary boıynsha alǵashqy kezeńdi aıaqtaǵany jónindegi sertıfıkattar tapsyryldy. Mine, úırenýge turatyn úrdis dep osyny aıtyńyz!
AQTО́BE
