Pavlodar oblysyndaǵy Aqkól aýylynda saıabaq ashylyp, onda ár kezderi osy óńirdiń ósip-órkendeýine eńbegi sińgen tulǵalardyń esimderi tasqa qashalǵan eskertkish qoıylyp, bilikti is atqarylypty. Sol tizimnen ákem – Musabekov Muqataı Esimbekulynyń atyn taba almaı tańǵalǵanymdy nesine jasyraıyn.
Pavlodar oblysyndaǵy Aqkól aýylynda saıabaq ashylyp, onda ár kezderi osy óńirdiń ósip-órkendeýine eńbegi sińgen tulǵalardyń esimderi tasqa qashalǵan eskertkish qoıylyp, bilikti is atqarylypty. Sol tizimnen ákem – Musabekov Muqataı Esimbekulynyń atyn taba almaı tańǵalǵanymdy nesine jasyraıyn.
Ol kisi 1936 jyly Shyǵys Qazaqstan oblysyna qarasty Pavlodar aýdanynyń Aqkól sovhozyna saýatsyzdyqty joıý jolyndaǵy ádistemeshi bolyp kelgen. 1938 jyly 7 jyldyq mektep ashylyp, ákemniń eńbegin joǵary baǵalaı otyra osy mektepke dırektor etip taǵaıyndaǵan. Sodan 1942 jyly maıdanǵa attanady da 1945 jyly elge aman-esen oralady. Kelgennen keıin de osy mektepke dırektor bolyp qaıta taǵaıyndalady. Halyq aǵartý salasynda kóp jylǵy jemisti eńbegi úshin aýdannyń, oblystyń Qurmet gramotalarymen jáne Qazaq KSR Joǵarǵy Keńesiniń Qurmet gramotasymen marapattalǵan.
Keıin Ekibastuz orta mektebiniń kórsetkishi tómen bolǵandyqtan, sol mektepke dırektor etip jiberdi. Sol jyldardyń ishinde nasıhatshy, úgitshi bolyp, neshe dúrkin partııa uıymy sekretarynyń orynbasary bolyp saılandy. Eli úshin, bolashaq urpaq úshin halyq aǵartý salasynda úzdik eńbek etken ákemizdiń qyzmeti keıingi jastar úshin de úlken ónege, úlgi dep bilemin. Bul kisiniń aldynan qanshama azamattar bilim alyp, ár jerde, ár elde eńbek etti.
Mine, osyndaı bilim ordasynyń kóshbasshysy bolǵan ulaǵatty ustazdyń eńbegin elegileri kelmegenderine nalyp, narazylyǵymdy bildirip, ákimniń atyna aryz jazdym. Bul kisiden keıingi dırektorlar jazylǵanda, alǵashqy mektep dırektoryn tastap ketýleriniń sebebin suraǵanymda, ákim durys jaýap bere almaı, ártúrli syltaýlar aıtty. Negizi men ol kisige eskertkishtegi esimder jazylmaı turǵanda ákemniń qalyp qoımaýyn esine salǵanmyn. Sonda ákim ol kisi jaıynda jaqsy biletinin, eńbegin qatty baǵalaıtynyn aıtqan.
Biz úlkendi syılap, arýaǵymyzdy qasterlep, salt-dástúrimizdi qurmettep ósken qazaqpyz. Sondyqtan da ár basqan qadamymyzdy shalys ketpeı, saralap otyrǵanymyz jón bolar. Iаǵnı: «Ne sebepti ákemniń eńbegi eskerilmeı qaldy?» degen suraqqa qanaǵattanatyn jaýapty tappaǵandyqtan, sizderge osy hatty joldap otyrmyn. Meniń ákem ǵana emes, Lenın ordendi Ábil Jaqypov, eki márte Lenın ordeniniń ıegeri Ábilshaıyq Jasanov, uzaq jyldar boıy aýylymyzda dırektor bolǵan Hamıt Mýsın, Aqkól sovhoz bolyp qurylǵannan beri eńbek etken Shákı Kakenov tárizdi adamdardy qalaı umytýǵa bolady? Bulardyń da balalarynyń, týystarynyń kókireginde osy: «Nege?» degen suraq turmaǵanyna kim kepil?
Sáýle MUSABEKOVA.
Pavlodar oblysy,
Ekibastuz qalasy.
