Eń qýanyshtysy, sol tosyn nátıjeni tirkegen ózimizdiń jerlesimiz. Kúni keshe qazaqstandyqtar arasynan alǵashqy bolyp «TOP-20» tennısshiniń qataryna engen 20 jastaǵy Elena Rybakına óziniń tusaýkeser kezdesýinde Reseıde týyp-ósip keıinnen AQSh-qa qonys aýdarǵan 21 jastaǵy Sofııa Kenınmen kúsh synasty.
Bıyl Aýstralııanyń ashyq birinshiliginde aıdy aspanǵa shyǵaryp, bas júldeni oljalaǵan álemniń jetinshi raketkasyna qarsy básekege «bes qarýyn asynyp» shyqqan Elena tamasha óner kórsetip, kózdegen maqsatyna qol jetkizdi. Bul tartys 2:7, 6:3, 6:3 esebimen Rybakınanyń paıdasyna sheshildi.
Báseke aıaqtalǵan bette BAQ ókilderine bergen suhbatynda qazaqstandyq tennısshi «Oıynnyń asa shıelensti bolatynyn sezdim. Sol sebepti de kortqa beldi bekem býyp shyqtym. Birinshi sette jeńilsem de, ózimdi ishteı jigerlendirdim. Asyqpaı júrip anyq bastym. Eń bastysy, júıem syr bergen joq. Al nátıjesin ózderińiz kórip otyrsyzdar» dep aǵynan jaryldy.
Búgin ekinshi kezeńniń oıyndary bastaldy. Bul básekede Elena Rybakına Chehııa oıynshysy, WTA tiziminde 58 orynda turǵan Katerına Sınıakovamen sheberlik baıqasady.
