Jıynǵa Senat depýtattary, Aýyl sharýashylyǵy mınıstrliginiń ókilderi, Qazaq ulttyq jemis-kókónis sharýashylyǵy ǵylymı-zertteý ınstıtýty men Kazakh Invest ulttyq kompanııasynyń basshylyǵy qatysty.
Shara barysynda senator Dáýren Ádilbekov osy kezdesý jemis-kókónis sharýashylyǵy salasyn damytýda ınvestısııa tartý maqsatyn kózdeıtinin atap ótti. «Otandyq ónimge arnalǵan sapaly kóshet materıaldarynyń tapshy bolýy osy salaǵa qatysty negizgi problemalardyń biri. Osy oraıda atalǵan salaǵa ınvestısııa tartý máselesi basty nazarda bolýy qajet», - dedi ol.
Qazaq ulttyq jemis-kókónis sharýashylyǵy ǵylymı-zertteý ınstıtýtynyń basqarma tóraǵasy Serik Sadyqovtyń aıtýynsha, búginde elimizdegi jemis daqyldary alyp jatqan jerdiń aýmaǵy 50 myń gektardy quraıdy. Jyl saıyn 7 mln dana jemis aǵashynyń kósheti qajet kórinedi. «Qajettiliktiń 80% ımport esebinen jabylyp otyr. Eń qymbat jemis-jıdek daqyldarynyń kóshetteri Italııa, Ispanııa, Polsha, Túrkııa jáne Serbııa elinen ákelinedi», - dedi ol.
Syrttan keletin kóshettermen birge elimiz aýmaǵyna túrli aýrý túrleri men zııakester de kelýde. Onyń ústine shetelden ákelinetin kóshetterdiń jergilikti aýa raıyna beıimdelýi uzaq ýaqyt alady. Ol óz kezeginde ónimniń sany men sapasyna keri áserin tıgizedi.
Sarapshylardyń aıtýynsha, kóshet otyrǵyzý materıaldaryna jumsalatyn qarjynyń syrtqa ketýi de ekonomıkalyq problemalardyń odan ári tereńdeı túsýine sebep bolyp otyr.
Senat depýttary talqylaý barysynda otandyq kóshet baǵasynyń qymbattyǵyna nazar aýdardy. Atap aıtqanda, О́zbekstan men Qyrǵyzstanda bir kóshettiń baǵasy 100 teńge bolsa, Qazaqstanda kóshet baǵasy 400 teńgeni quraıdy.
Jemis-kókónis sharýashylyǵy ǵylymı zertteý ınstıtýtynyń basshysy S.Sadyqov tıisti agrotehnıkalyq erejelerdi saqtap ósirilgen sapaly kóshettiń ózindik quny elimizde 280-300 teńge ekenin aıta kelip, О́zbekstanda 100 teńgege sapasyz kóshet satylatynyn, al sapaly kóshet ol elde 1000-1500 teńge turatynyn jetkizdi.
Senator Muratbaı Joldasbaev kezdesýde jemis-kókónis sharýashylyǵynda qatań retteý men standarttaýdyń joqtyǵyna toqtaldy. «Bylaı alyp qarasaq – biz almanyń otanymyz. Al qazir syrttan júz myńdaǵan tonna alma ákelinýde, onyń sapasynyń qandaı ekeni belgisiz. Osyny retteý máselesin birigip qarastyratyn bolamyz», - dedi ol.
Ekonomıkalyq saıasat, ınnovasııalyq damý jáne kásipkerlik komıtetiniń tóraǵasy Serik Jaqsybekov otyrysty qorytyndylaı kelip, talqylanǵan máselelerdiń mańyzyn atap ótti.
«Memleket úshin jumystyń júrgeni mańyzdy. Bizde ózimizdiń elıtalyq tuqymdyq materıal bar. Ol aldymen ishki naryqty qamtamasyz etip, artyq qalǵany kórshi elder naryǵy arqyly satylatyn bolady», - dedi ol.
