Joldardaǵy qurylys, jóndeý jumystarynyń barysy men joldyń sapasyn Qazaqstannyń árbir turǵyny baqylaı alady. Arnaıy ázirlengen mobıldi qosymshada tirkele otyryp, paıdalanýshylar fotomaterıaldardy, avtomobıl joldary salasyndaǵy jobalardyń sapaly iske aspaýyna qatysty aqparatty, aqaý oryndaryn jibere alatyn bolady. Ulttyq jol aktıvteri sapasy ortalyǵynyń saıtynda jınaqtalǵan aqparat Ortalyqtyń óńirlik bólimderi men jergilikti atqarý organdaryna olqylyqtardyń joıylýy úshin joldanady. «Azamattyq baqylaý» qosymshasy arqyly materıal joldaǵan paıdalanýshynyń jeke kabınetine túsirilgen aryzdyń jaǵdaıy týraly habarlama jáne olqylyqtyń joıylǵandyǵyn dáleldeıtin fotoesep keledi.
Qosymshany ázirleýshilerdiń aıtýyna qaraǵanda, málimetter keste túrinde jınalmaq. Onda eldiń belgili bir óńiri belgilenip, máseleniń oryndalý jaǵdaıy kórsetiledi. Budan keıin aqparat avtomatty rejımde Qazaqstan kartasynda belgilenedi. Osylaısha, eldiń ár óńirindegi jaǵdaı baqylaýǵa alynbaq. Qosymshany osy jyldyń naýryzynan bastap Android jáne iOS platformalarynda tegin júkteýge bolady.
Sondaı-aq bıyl elimizde «Jol aktıvterin basqarý júıesi» atty basqa qosymsha iske qosylady dep kútilýde. Qosymshada joldardyń jaǵdaıy týraly málimetter men jol boıynda kórsetiletin qyzmetterdiń tizimi paıdalanýshylar úshin qoljetimdi bolmaq.
