Kúnine bir jaqsylyq jasa!

Rýhanııat • 21 Aqpan, 2020

Kúnine bir jaqsylyq jasa!

128 ret kórsetildi

Volonter jyly Prezıdent Qasym-Jomart Toqaevtyń Jarlyǵymen aıdarlanǵan jyldyń nesibesi de, jańalyǵy da mol bolatyn syńaıly. Volonterlerdiń «Birgemiz!» respýblıkalyq front-keńsesin ashqan Memleket basshysy: «Otandy súıý degenimiz aıǵaıshyl urandar men qurǵaq sózder emes, bul kúndelikti eńbek etý, sonyń ishinde jan qalaýy boıynsha qaıyrymdy istermen halyqtyń ıgiligine eńbek etý» dep anyq aıtty.

Egemen Qazaqstan

Bul oqýshy jáne bilimger jastardy (stýdent, magıstrant, doktorant) ǵana emes, jasamystardy da, tipti tutas qoǵamdy ortaq iske – ónege, tárbıe, ımandylyq, tájirıbe shyńdalatyn sharalarǵa jumyldyrady. Dál osylaı atalmasa da onyń mazmunyna sáıkesetin is-áreket, qyzmet elimizde erte zamannan beri bar. Shynynda, álemniń barsha jurtynda kezdesetin ıgi dástúrdiń úzilmeı, qaı zamannyń bolsyn talabyna saı jandanýy, tolyǵýy – ǵalamdyq jasampazdyq pen rýhanı jańǵyrýdyń bir kórinisi. Osy turǵyda taıaýda ǵana L.N.Gýmılev atyndaǵy Eýrazııa ulttyq ýnıversıteti jarııa etken jobalardyń máni, aýqymy, formaty ózge oqý oryndaryna úlgi bolyp, talapshyl jastardy, qalyń jurtshylyqty serpiltedi degen oıdamyz. «Jaqsy is», «Qaıyrymdy orta», «Mádenı suhbat», «О́risti óner», «Taza elorda», «Medıa alań» sııaqty ataýynyń ózi alqaly ortanyń basyn qosatyn jobalar ekeni, jeke adamdardyń muqtajynan bastap, qoǵamnyń, áleýmettiń qajetterine deıin qamtıtyny baıqalady. Sonyń ishinde azamattarǵa túrli qyzmetti ınternet kómegimen alýdy úıretý, óz quqyǵyna qatysty zań normalaryn bilý men paıdalanýdy kórsetý, barlyq jannyń sońǵy turaǵy – zıratqa deıin retteý, basqa da qasterli oryndarda dástúrli mádenıet úderisin qalyptastyrý, t.b. ıgi sharalar bar ekeni qýantady.

Árıne, volonterliktiń myń san túri bar. Odan da basqa formalary bolýy múmkin, shektelýge de tıis emes. Qala men dalamyzdyń óz erekshelikterin eskere otyryp, jan qalaýymen kóp izgi is atqarýǵa múmkindik mol. Ilgeriden Otanymyzda jıi aıtylatyn jáne ár júrektiń tórinen oryn alǵan «Kúnine bir jaqsylyq jasa!» degen aqjarylqap tilek qoǵam jaýapkershiligin sezingen adamnyń erik-jigerinen, kemeldikke umtylǵan eldiń suranysynan týsa kerek-ti. «Jaqsylyq jasasań qaıtady, qaıtpasa – aıtady», ıaǵnı bul áreket esepke qurylmaıdy jáne esesin de suramaý kerek. Qarymtasyn kútý degen qaryz berýmen teń bolmaq. О́ıtkeni shekarasy men shegi júrek pen namys ershatyna ǵana jazylǵan qaıyrymdylyq, meıirimdilik, adamshylyq, gýmanıstik, azamattyq qaǵıdattardan bastaý alatyn qadamdar adamdar arasyndaǵy qatynastardy jańa sapaǵa, jańa beleske kóteretini sózsiz.

Taǵy bir mańyzdy jaıtty aıtý artyq etpes. Osynaý jańa bastamada, Memleket basshysy eskertkendeı, «naýqanshyldyqtan arylýdyń» ónegesin kórsetýge tolyq jaǵdaı da, múmkindik te bar. Iаǵnı elimizde shynaıy volonterlik baǵdarlamalardyń, eriktiler qozǵalysynyń órkendeýine negiz qalaıtyn kezdi bosqa ótkizbesek, bıyl mereıtoıyn atap ótkeli otyrǵan Abaıdyń ósıetine de adaldyǵymyzdy tanytar edik. Laıym, solaı bolsyn!

Darhan MYŃBAI,

Májilis depýtaty

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz