Jas talap ǵalym Shyryn Ádilqyzynyń aıtýynsha, Abaı Qunanbaıulynyń 175 jyldyǵyna arnalǵan shara Aqmola oblystyq soty men Shoqan Ýálıhanov atyndaǵy Kókshetaý memlekettik ýnıversıtetiniń bastamasymen júzege asyrylǵan eken. Ǵylymı-tájirıbelik konferensııaǵa Abaı elinen kelgen Shákárim ýnıversıtetiniń ókilderi de qatysyp qaıtypty. Atap aıtqanda, Shákárim ýnıversıtetiniń professory Nazıgúl Ǵazızova «Qazirgi zaman men Abaı shyǵarmasyndaǵy adam quqyǵynyń úndestigi» týraly baıandama jasap, Abaı zamanyndaǵy qylmystyq isterge qatysty quqyqtyq qujat– Qaramola erejesiniń kóshirme nusqasymen tanystyrǵan.
Ýnıversıtet ókilderi konferensııa barysynda Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq qoryq-murajaıynan arnaıy alynǵan derektik materıaldardan Abaıdyń ómiri men shyǵarmashylyǵyna arnalǵan kórme jumysyn uıymdastyryp, qatysýshylardyń nazaryna usynǵan edi. «Rýhanı jańǵyrý» Semeı jobalyq keńsesiniń ǵylymı qyzmetkeri Shyryn Qaýanova qatysýshylardy kórme jumysymen tanystyryp, Abaıdyń nemere inisi Shákárimniń «Úsh anyq» fılosofııalyq traktatyn kelgen qonaqtarǵa usyndy.
-Ǵylymı sharada Abaı arqyly qazaq elin órkenıetke jeteleıtin, rýhanı baıytatyn, abyroıyn asqaqtatyp, mártebesin bıiktetin, yntymaq pen birlikke, bilim men ǵylymǵa, óner men mádenıetke baýlıtyn ári adamzattyń jan dúnıesine oı salatyn baıandamalar tyńdaldy,-deıdi Shyryn Qaýanova,- Plenarlyq bólimde Aqmola oblysynyń ákimi Ermek Boranbaıuly Abaıdy ulyqtaýǵa arnalǵan jıynǵa sáttilik tilep, uıymdastyrýshylarǵa alǵysyn bildirse, Joǵary soty tóraǵasynyń keńesshisi Nurlan Nurahmetuly Qazaqstan Respýblıkasy Joǵary soty tóraǵasynyń quttyqtaý sózin oqydy.
Tanymdyq konferensııaǵa Qazaqstan Respýblıkasy Joǵarǵy Soty Tóraǵasynyń keńesshisi N.Qalqa, Aqmola oblysynyń ákimi E.Marjyqpaev, Qazaqstan Respýblıkasy Ardagerler uıymy tóraǵasynyń orynbasary, tarıh ǵylymdarynyń doktory, professor О́.Ozǵanbaev, Sh.Ýálıhanov atyndaǵy memlekettik ýnıversıtetiniń rektory M.Syrlybaev jáne Shákárim ýnıversıtetiniń ǵalymdary jáne Kókshetaý qalasynyń joǵary jáne orta oqý oryndarynyń basshylary, respýblıkalyq, oblystyq sot salasynyń ardagerleri, oblystyq quqyq qorǵaý organdarynyń basshylary, sýdıalar, sot salasynyń qyzmetkerleri, eńbek ardagerleri men BAQ ókilderi de qatysty.
Jıyn barysynda Aqmola oblystyq sotynyń tóraǵasy Dosjan Ámirov Abaıdy tereńirek taný maqsatynda oıshyldyń danalyq sózderin oqý boıynsha «Ár sózinen uǵyndyrǵan ulylyq» taqyrybyndaǵy estafetalyq chellendjge 200-ge jýyq sýdıalar men sot qyzmetkerleriniń belsendi qatysqanyn jáne 50-den astam beınematerıaldyń jaryqqa shyqqanyn habarlady. Igi is-sharanyń jalǵasy osynaý mańyzdy ǵylymı-tájirıbelik konferensııaǵa ulasqanyn aıtty.
Semeı
