Merekelik shara barysynda ulttyq kıim kıgen etnomádenı birlestik tóraǵalary men ardagerleri jergilikti jurtshylyqpen amandasyp, dostyq ráýishterin bildirdi. Sonymen qatar, kelýshilerge 12 túrli ulttyq taǵamnan ázirlengen Alǵys dastarhany jaıyldy. Kóne shahar turǵyndary merekelik dastarhannan dám tatsa, túrik, orys, kúrdi, ázirbaıjan, dúngen ultynyń ókilderi qazaq halqyna alǵystaryn jetkizdi. Kópshilik bir-birimen qushaqtasyp, qol alysyp, ózderiniń aq nıetin tanytty.
Saltanatty sharany Jambyl oblysynyń ákimi Berdibek Saparbaev sóz sóılep ashyp, óńir turǵyndaryn merekelerimen quttyqtady. «Alǵys aıtý kúni – tarıhtyń túrli kezeńderinde qazaq halqynyń baýyrmaldyǵyna bólengen túrli etnos ókilderiniń kıeli qazaq jeri men qonaqjaı qazaq halqyna degen tereń taǵzymynyń ashyq belgisi. Rasynda, ótken tarıhta taǵdyr taýqymetimen Uly Dala tósine ár jyldarda bútindeı bir halyqtar – 800 myńǵa jýyq nemis, 102 myń polıak, 550 myń Soltústik Kavkaz halyqtarynyń ókilderi, 18 myńnan astam Qıyr Shyǵystaǵy koreı otbasylary qonys aýdardy. Búginde bizdiń qasıetti Jambyl jerinde 87 etnos, 21 etnomádenı birlestik ókilderi Assambleıa quramynda birlik pen tatýlyqta ómir súrýde. Oblysymyzda kúrdi, túrik, dúngen jáne ózge de ulttar tyǵyz shoǵyrlanǵan 5 aýdan bar. Kópulttylyq – bizdiń basymdyǵymyz, birlik – sarqylmas baılyǵymyz», dedi ákim. Sonymen qatar, Qazaqstannyń Halyq artısi, Memlekettik syılyqtyń laýreaty Tuńǵyshbaı Jamanqulov óziniń lebizin jetkizdi. «Biz qazaq degen qushaǵymyz keń, aqkóńil, adal, ańǵal halyqpyz. Bizdiń baýyrymyzǵa qanshama halyqtar, ulttar, syıyp ketip jatyr. Bizdiń eń keremet qasıetterimizdiń biri bul», dedi ol. Sondaı-aq, «Polonez» polıak etnomádenı birlestiginiń jetekshisi Larısa Kalkova, «Barbang» kúrdiler assosıasııasy oblystyq aqsaqaldar keńesiniń múshesi Sabrı Asanov barsha ult pen ulystardyń atynan qazaq halqyna alǵysyn bildirdi.
Merekelik shara barysynda túrli etnostardyń qazaq jerine qonystanýy týrasynda teatrlandyrylǵan qoıylym qoıylyp, sońy óner juldyzdarynyń konsertine ulasty. Sondaı-aq, Qordaı aýdanyndaǵy Masanchı aýylynda 2000 adamdy qamtıtyn «Birligi jarasqan, týǵan jerim – Qordaıym» atty Alǵys aıtý festıvali ótti. Merekelik sharaǵa jınalǵan kópshilik aýdan ortalyǵy Qordaı aýylyndaǵy Noǵaıbaı bı eskertkishine gúl shoqtaryn qoıdy. Sonymen qatar, Alǵys dastarhany jaıylyp, Qordaı, Qarakemer, Qarasý aýyldarynan kelgen turǵyndar dastarhannan dám tatty. Alǵys aıtý kúnine oraı óńirde bastaý alǵan sharalar Naýryz aıyndaǵy merekelerde jalǵasatyn bolady.
Jambyl oblysy
