Osy oraıda Memleket basshysynyń kezdesýde «volonterlik –erikkenniń ermegi emes. Bul eldik máni men mańyzy joǵary istiń biri. Volonterlik baǵytqa bet burǵandar ýaqytty bosqa ótkizip júrmin degen oıdan aýlaq bolýy kerek» deı kele aldaǵy kezde volonterlik jobalardy júzege asyrýǵa ketken ýaqyt eńbek ótiline kiretindigi jónindegi tujyrymdy alǵa tartty. Bul sóz elimizdiń ár túkpirinen kelgen volonter jastardyń mereıin bir kóterip tastady. Ári munyń ózi Prezıdent bastamasymen ómirge kelgen barlyq volonterlik baǵdarlamalardy oıdaǵydaı júzege asyrýǵa jan-jaqty múmkindik beredi. Atalǵan qoldaý aldaǵy kezde baǵdarlama aıasyndaǵy jeti baǵyttyń bárine de ortaq ekendigi atqarylatyn isterdiń arnasyn keńeıte túspek. Onyń bári «Biz birgemiz!» atty jalpyulttyq uranǵa ulasyp, keleshekte bederli izin sala alatynyna eshqandaı kúmán joq.
Prezıdenttiń elimizdegi volonterlik isti qoldaý men yntalandyrýǵa qatysty qozǵaǵan ekinshi máselesiniń de alatyn orny men salmaǵy joǵary. Atalǵan jaıt volonterlik sıpattaǵy jobalardy qarjylandyrý qajettiliginen týyndaıdy. Memleket basshysynyń málimdeýinshe, mundaı tetikterdi ornyqtyrýdyń birneshe joldary bar. Sonyń eń bastysy, belgili bir baǵyt boıynsha óz jobalaryn jergilikti atqarýshy organdar men Aqparat jáne qoǵamdyq damý mınıstrligine usynǵan volonterlik toptar men qurylymdarǵa arnaıy granttar berý bolmaq. Onyń kólemi – 300 myń men 1 mln teńge tóńireginde belgilenetin kórinedi.
Bizdiń joǵary oqý ornynda volonter bolýǵa talap-tilek bildirgen stýdentterdiń qatary jyldan-jylǵa ósip keledi. Olardyń deni kúlli áleýmetke paıdasy men shapaǵatyn tıgize alatyn ómirsheń jobalar. Osy turǵydan kelgende Prezıdent Qasym-Jomart Toqaev elimizdiń barlyq óńirinen jınalǵan volonter jastarǵa aldaǵy ýaqytta atqarylatyn naqty is-qımyl josparyn shegelep aıtyp bergeni bizdiń jańa jobalardy qolǵa alýymyzǵa serpin beredi. Aqyn Tólegen Aıbergenovtyń óleń shýmaǵymen órsek, bul «janam degen júrekke ot berýdiń» taptyrmas joly bolyp shyǵady.
Narqozy Qartjan,
volonter, Q.Jubanov atyndaǵy Aqtóbe óńirlik memlekettik ýnıversıteti jastar isteri jónindegi komıtettiń tóraǵasy
AQTО́BE
