Forýmǵa qatysqan Premer-Mınıstr Asqar Mamın otandyq kásipkerlerdi qoldaý maqsatynda iske asqan ilkimdi jobalardyń aldaǵy ýaqytta da jalǵasatynyn aıtty.
– «Samuryq-Qazyna» júrgizgen tájirıbe tabysty ekenin kórip otyrmyz. Barlyq memlekettik satyp alýlarǵa qatysýshy memlekettik organdar, kvazımemlekettik kompanııalar men jer qoınaýyn paıdalanýshylar úshin úlgi bolýy tıis, − dedi A.Mamın.
Jıynda sóz alǵan «Samuryq-Qazyna» ulttyq ál-aýqat qory» basqarma tóraǵasy Ahmetjan Esimov damyǵan elderdiń tájirıbesin negizge ala otyryp, satyp alý júıesi el ekonomıkasynyń ishki áleýetin damytýdyń naqty jáne tıimdi tetigine aınalýy qajet ekenin aıtty.
− Basymdyq beretin baǵyttardyń biri − qordyń satyp alý júıesin jetildirý. 2018 jylǵy qordyń satyp alý qurylymyna arnaıy taldaý júrgizildi. Bul kezeńde satyp alýdyń jalpy kólemi – 3,3 trln teńge bolsa, onyń 90 paıyzy, ıaǵnı 3 trln teńgesi bir kózden satyp alynǵan. Bul óz kezeginde básekelestik ortanyń joqtyǵyn kórsetedi. Sondyqtan osyndaı olqylyqtardyń ornyn toltyrý úshin 2 jyldyń ishinde 4500 pozısııadan 198 pozısııaǵa deıin qysqarttyq. Nátıjesinde 650 mlrd teńgeden astam somaǵa satyp alýlar básekelestik ortaǵa berilip, bul qarajatty 13 myńnan astam shaǵyn bıznes ókilderi ıgerdi. Al qorǵa qarasty kompanııalar 40 mlrd teńge únemdedi, − dedi A.Esimov.
Qordyń basqarma tóraǵasy satyp alýdy qysqartý jáne tenderlik satyp alýlardy ulǵaıtý jónindegi Memleket basshysy Qasym-Jomart Toqaevtyń tapsyrmasyn negizge alyp, bul baǵytta qor tarapy josparly túrde sharalar qabyldaǵanyn aıtty.
Sonymen qatar otandyq kásipkerlerdi qoldaý maqsatynda da birqatar júıeli jumystar júrgizilgen.
− Úkimet «qarapaıym zattar ekonomıkasynyń» salalaryn damytýǵa erekshe kóńil bólýde. Qor men kompanııalar toby atalǵan baǵdarlamany iske asyrýǵa belsendi qatysyp keledi. О́tken jyldyń qorytyndysy boıynsha otandyq taýar óndirýshilerden ónim satyp alý kólemi artty. Bıyl taǵam ónimderiniń úlesin − 90%-ǵa, (2019 jyly – 76%), jeńil ónerkásip ónimderi − 85%-ǵa (2019 – 73%), qurylys – 92%-ǵa (2019 – 82%), jıhaz – 85%-ǵa (2019 – 48%) jetkizý josparlanyp otyr, − dedi A.Esimov. Basqarma tóraǵasy óz sózinde otandyq taýar óndirýshilerimen offteık-kelisim jasaý jobalaryn iske asyrýǵa basymdyq beretinin aıtty.
− 2018 jyly bizdiń kompanııalarda syrttan ımporttalatyn taýarlarǵa taldaý júrgizildi. Sońǵy úsh jylda taýarlardyń osyndaı tizimi boıynsha ımport kólemi shamamen 500 mlrd teńgeni qurady. Biz bıznes-qoǵamdastyqqa uzaq merzimdi kelisimshart negizinde kepildik berip, Qazaqstanda osy taýarlardyń óndirisin jolǵa qoıýdy usyndyq. 2018 jyly offteık-kelisim boıynsha alǵashqy 2 joba, byltyr 25 joba maquldandy. Sondaı-aq ımport almastyrý úshin áleýeti bar taýarlardyń tizimi jarııalandy. Jaqyn arada otandyq kásipkerler tarapynan ótinishter túsedi degen senimdemiz, − dedi «Samuryq-Qazyna» ulttyq ál-aýqat qory» basqarma tóraǵasy A.Esimov.
Forým barysynda qordyń portfeldik kompanııalary men qazaqstandyq kásiporyndar arasynda 34,8 mlrd teńge soma bolatyn kelisimge qol qoıyldy.
