Premer-Mınıstriniń orynbasary E. Toǵjanov elimizdiń maskalarmen tolyq qamtamasyz etiletinin aıtty.
«Árıne, jekelegen dárihanalarda búginde shynymen de maskalar joq shyǵar. Biz oǵan kepildik bere almaımyz. Bul taqyryp kóterilgen alǵashqy kúnderi Qazaqstanda ǵana emes, kóptegen elderde osyndaı dúrbeleń oryn aldy. Sondyqtan, árıne, belgili bir tapshylyq boldy. Biraq qazir bul máseleniń barlyǵy tolyǵymen memlekettiń baqylaýyna alynǵan. Maskamen qamtamasyz etý máselesi búginde kún tártibinde tur. Bizdiń óz kompanııalarymyz bar, sondyqtan barlyq memleketter qazir osy máselege alańdaýshylyq bildirip otyr, ózderi shyǵaratyn maskalardy jibermeıdi. Sol sebepti bizdiń barlyq tórt kompanııa tolyq jumys istep jatyr. Qazaqstan maskalarmen tolyq kólemde qamtamasyz etiledi. Taǵy da aıtamyn, eger jekelegen dárihanalarda maskalar bolmaı qalsa, ol Qazaqstanda bizdiń buǵan ázir emestigimizdi bildirmeıdi», — dedi E. Toǵjanov.
Sondaı-aq ol naqty memlekettik organdarǵa, eń aldymen, shekara mańy jáne keden qyzmetterine Qazaqstan shekarasynan tys jerlerge maskalardy shyǵarýǵa qatań tyıym salý týraly tapsyrma berilgenin habarlady. E. Toǵjanovtyń aıtýynsha, mundaı áreketter, eń aldymen, Qazaqstannan Qytaıǵa jetkizý turǵysynan oryn alǵan.
Densaýlyq saqtaý mınıstri E. Birtanovtyń aıtýynsha, deni saý adamǵa maska kııýdiń qajeti joq. Eń aldymen, maskalar naýqastar men táýlik boıy túrli ınfeksııalary bar pasıenttermen baılanysqa túsetin medısına qyzmetkerleri jumys isteıtin medısınalyq mekemelerde mindetti túrde bolýy tıis.
«Biz medısına uıymdaryna adamdardy qorǵaý úshin qor qalyptastyrdyq. Eger siz ózińiz aýyryp júrseńiz, tipten qarapaıym tumaý bolsa da, aınalańyzdaǵy adamdardy qorǵaý úshin maska taǵyp júrýińiz qajet. Oryn alǵan dúrbeleń, baıbalam úlken shyǵyn ákelýde, sebebi bólshek saýdadaǵy búkil kólemdi azamattar búginde satyp alǵan. Qosymsha óndirý máselesi qaralyp jatyr», — dedi densaýlyq saqtaý mınıstri.
О́z kezeginde Indýstrııa jáne ınfraqurylymdyq damý vıse-mınıstri Berik Qamalıev qazaqstandyq kásiporyndardyń ónimdiligi táýligine 170 myń maskany qurap otyrǵanyn habarlady.
«Aı saıyn bul kásiporyndar 5 mln dana maska shyǵarady. Ony 6,5 mln danaǵa deıin kóbeıtýge múmkindik bar. Sondyqtan Densaýlyq saqtaý mınıstrligimen birlesip, Premer-Mınıstrdiń tapsyrmasy boıynsha biz olardy qamtamasyz etýmen aınalysyp jatyrmyz. Olardyń shıkizaty jyl sońyna deıin jetkilikti. Tek bir kompanııada QHR-dan jetkizýshiler shıkizat ornyna medısınalyq maskalardyń 50%-yn berýdi suraǵan jaǵdaı boldy. Bul másele sheshildi», — dedi B. Qamalıev.
