«Quramyna 200-den astam stýdentti biriktirgen mektep sabaqtastyq, saýlyq, taza álem, asyl mura, qamqor, bilim, úmit sekildi jeti baǵyt boıynsha 19 aqpannan 19 mamyrǵa deıin jumys isteıdi. Atalǵan baǵyttar boıynsha Eriktiler mektebinde dáris oqylyp, semınar-trenıngter men sheberlik sabaqtar uıymdastyrý josparda bar» deıdi ýnıversıtet rektory Muhtar Tólegen.
Jalpy, qazirgi ýaqytta bul oqý ornynda 2 myńnan astam stýdent eriktiler quramynda jumys isteıdi eken. Al jańadan ashylǵan Eriktiler mektebi 3 aı kóleminde 200 stýdentti oqytyp, daıyndap shyǵarmaq. «Bilim jáne ǵylym mınıstrliginiń tapsyrysyna sáıkes biz 240 eriktini daıyndap shyǵarýǵa tıispiz. Budan bólek oblys ákimdigi de ózderiniń ótinish-tilekterin bildirip otyr. Eriktiler mektebinde stýdentterdi Abaı shyǵarmashylyǵymen, Qazaqstannyń tarıhymen, jetistikterimen, Elbasynyń qaıratkerlik qyrlarymen, Shyǵys Qazaqstan jaıyndaǵy maǵlumattarmen jan-jaqty tanystyramyz. Bıyl elimizdegi eń mereıli data Abaı toıy bolǵandyqtan bul aýqymdy sharaǵa volonterler jiberý oıymyzda bar. Eki júz stýdenttiń ishinen 80-in iriktep, tańdap alamyz. Olar Abaı toıyna kelgen qonaqtarǵa qyzmet kórsetedi. Eriktilerge abaıtanýshy, fılologııa ǵylymdarynyń doktory Aıjan Qartaeva, Lıýsııa Abdýllına, «2019 jyldyń úzdik oqytýshysy» atanǵan Janna Áýbákirova, Raýshan Nurbekova, Prezıdent janyndaǵy memlekettik basqarý akademııasynyń aǵa oqytýshysy Gúlfııa Berikbolova syndy bilikti ustazdar sabaq beredi», deıdi atalǵan oqý ornynyń kásiptik daıarlaý jáne biliktilikti arttyrý resýrstyq ortalyǵynyń dırektory Baqytjan Kelgenbaeva.
О́SKEMEN
