Degenmen, Finprom.kz saıtynyń málimetine sensek, Qazaqstanda jumyssyzdyq azaıǵan. Bir jyl ishinde jumyssyzdar sany 0,1 paıyzǵa tómendese, 2019 jyldyń tórtinshi toqsanynda jumyspen qamtylǵan halyq sany 8,8 mln adamdy qurap, bir jylda 0,7 paıyzǵa artqan. О́tken jyldyń sáıkes kezeńinde kórsetkish 8,7 mln adamdy qurap, bul jyl ishinde 2%-ǵa ósipti.
Ásirese, elordada jumyspen qamtylǵan azamattardyń sany artyp otyr. Jyldyq ósim 9,2%-dy qurap, 553,6 myń adamǵa deıin kóbeıgen. Atyraý oblysynda jumyspen qamtylǵandar sany 4,1%-ǵa, Almatyda 2,9%-ǵa ósken. Desek te jumyspen qamtylǵandardyń basym bóligi kóterme jáne bólshek saýda sektorynda jumys isteıdi. Iаǵnı 1,4 mln adam kólik jóndep, nápaqa tabady. Sondaı-aq jetekshi salalardyń úshtigine aýyl, orman jáne balyq sharýashylyǵy (1,2 mln adam nemese 13,4%) jáne bilim berý (1,1 mln adam nemese 12,7%) salalary kirip otyr. Jumyspen qamtylǵan halyqtyń eń kóp sany boıynsha TOP-5 salany ónerkásip (1,1 mln adam) jáne qurylys (642,2 myń adam) túıindeıdi.
Sonymen birge eldegi jumyssyz halyq sany 441,4 myń adamdy qurap, 2018 jyldyń sáıkes kezeńimen salystyrǵanda 0,1%-ǵa qysqarǵan (441,9 myń adam). Alaıda elimizde jumyssyzdyq deńgeıiniń máni ózgerissiz qalyp otyr – 4,8%. Jumyssyzdardyń basym bóligi ádettegideı halyq tyǵyz qonystanǵan óńirlerde baıqalady. Máselen, Almatyda (jylyna 49,2 myń adam), sondaı-aq, Almaty oblysynda (48,2 myń adam) jáne Túrkistan (42,1 myń adam) oblysynda alaqanyn ysqylap otyrǵandar az emes. Sol sekildi Shyǵys Qazaqstan men Qaraǵandy oblystarynda jumyssyzdar sany tıisinshe 34,5 myń jáne 29,7 myń adamdy qurady. Jumyssyzdyqtyń joǵary deńgeıi Túrkistan oblysynda, Almaty men Shymkent qalalarynda baıqalyp otyr – 5,1%.
Jumys demekshi, aldaǵy onjyldyqta álemde tehnologııa salasyndaǵy mamandyqtar úlken suranysqa ıe bolady deıdi mamandar. Olar – bıoınjener, bıofarmakolog, bıoınformatıka, aqyldy qorshaǵan ortany jobalaýshy, robototehnıka mamany, kıberqaýipsizdik boıynsha maman, balamaly energetıka jónindegi maman.
Rekrýtıng portalynyń málimetinshe, qazirdiń ózinde atalǵan salalardaǵy mamandar suranysqa ıe ári olardyń mańyzy arta túsýde. Sondaı-aq neıropsıholog, baǵdarlama jasaýshy, dızaıner, 3D-baspa ınjeneri, vırtýaldy álemniń sáýletshileri men dızaınerlerin de erekshe atap ótken abzal.
