«2020 jyldyń 3 naýryzynda Ońtústik Koreıanyń áleýmettik jelileriniń orys tildi toptarynda Ońtústik Koreıada zańsyz júrgen Qazaqstan azamaty koronavırýs juqtyrǵany týraly aqparat taraldy. Sonymen birge naýqastyń klınıkadan qashyp ketkeni, qazirgi ýaqytta polısııa izdeý jarııalaǵany da aıtylǵan. Qazaqstannyń Ońtústik Koreıadaǵy Elshiligi tıisti sharalar júrgizip, nátıjesinde aqparattyń jalǵan ekenin anyqtady», dedi A.Smadııarov.
Koreı polısııasynyń aqparatyna sáıkes, osydan birneshe kún buryn qazaqstandyq azamat koronavırýske shaldyqqan birneshe adam barǵan qoǵamdyq orynda bolǵan. Odan keıin belgilengen tártipke sáıkes, oǵan jáne sol orynda bolǵan barlyq adamdarǵa aýrýdyń syrtqy belgileri baıqalǵan jaǵdaıda vırýstyń bar-joǵyn anyqtaý testin tapsyrý qajettigi eskertilgen. «Otandasymyz barlyq qajetti medısınalyq prosedýralardan ótýge jáne jergilikti bılikpen yntymaqtasýǵa daıyn. Bizdiń Elshilik koronavırýs Ońtústik Koreıa aýmaǵynda anyqtalǵan alǵashqy kúnnen bastap jergilikti Ishki ister mınıstrligimen jáne Aýrýlardy baqylaý, aldyn alý koreı ortalyǵymen tyǵyz jumys istep keledi. Atalǵan ortalyqtyń usynysy boıynsha bizdiń otandasymyz telefon arqyly kúndelikti densaýlyǵyna baqylaý júrgizip, úı karantıninde bolýy qajet», dedi A.Smadııarov.
Jergilikti polısııada bizdiń azamatpen baılanys ornatylǵan. Ol buǵan deıin klınıkaǵa barmaǵanyn jáne koronavırýs bar-joǵyn anyqtaıtyn qandaıda bir saraptama tapsyrmaǵanyn jetkizgen. Resmı ókil Qazaqstannyń Ońtústik Koreıadaǵy Elshiligi bul máseleni turaqty baqylaýǵa alǵanyn habarlady.
Sonymen qatar jıynda Ońtústik Koreıadan Qazaqstan azamattaryn evakýasııalaý máselesi qarastyrylmaǵany belgili boldy. «О́zderińiz de bilesizder, ol jaqta 35 myń azamatymyz bar. Ázirge olardy evakýasııalaý máselesi kóterilip otyrǵan joq. Azamattarymyzdyń keıbiri Koreıa aımaǵynda zańsyz júr. Olardyń da qaýipsizdigi úshin medısınalyq ortalyqtarmen kelissóz júrgizip jatyrmyz», dedi A.Smadııarov. Buǵan deıin Koreıa men Qazaqstan arasyndaǵy áýe reısteriniń qysqartylǵany habarlanǵan bolatyn.
