Sýretti túsirgen Valerıı Býgaev
Qazir tramvaı basqarmasy kólik parkin jańartýda. Sońǵy eki jylda Belarýs elinen dybyssyz júretin 20 jańa tramvaı satyp alyndy. Buǵan qala turǵyndary qýanyshty. Bıyl 1 naýryzdan bastap tramvaıdaǵy jol júrý bıletteriniń baǵasy arzandady. Buǵan deıin bir aı boıy júrýge arnalǵan bıletti turǵyndar 6500 teńgege satyp alsa, endi onyń baǵasy 5 myń teńge bolady.
Basqarma tóraǵasy Mýslım Mahmýdovtyń málimdeýinshe, turǵyndardyń tramvaı qyzmetin paıdalanýda dıfferensıaldy júıe túri engizildi. Bul jańashyldyqtyń máni buryn bir aıǵa beriletin júrý bıletteri ár aıdyń 25-i men kelesi aıdyń 5-i aralyǵynda satylatyn. Endi osy aralyqta tramvaıdyń bir aılyq jol júrý bıletterin satyp alýǵa úlgermegen turǵyndar aıdyń kez kelgen kúninde alýyna múmkindik bar.
Taǵy bir jańashyldyq – bir jyldyq jol júrý bıletteri kún saıyn tramvaı qyzmetin paıdalanatyn kóp balaly otbasylarǵa da beriledi. Kásiporyn Nur Otan partııasymen birlesip, kóp balaly otbasylarǵa qoldaý kórsetýde.
– Qazir turǵyndardyń ártúrli áleýmettik sanattaryna arnalǵan bıletter shyǵarylady. Buryn oqýshylarǵa, stýdentterge jáne zeınetkerlerge arnalǵan arnaıy bıletter bolǵan joq. Aldaǵy aılarda oqýshylar men zeınetkerlerge arnalǵan bir aılyq bılet baǵasy 2500 teńge, stýdentterdiń bıletteri 3 myń teńge bolmaq, – deıdi basqarma tóraǵasy.
PAVLODAR
