«Biz kún saıyn azamattardy aqparattandyrýmen aınalysyp jatyrmyz. Mınıstrliktiń ınternet resýrstarynda mańyzdy málimetter óz ýaqytynda jarııalanýda. Soǵan qaramastan, ártúrli áleýmettik jelilerde jalǵan aqparattar tarap, eldi dúrliktirýde. Mysaly, búgin ýatsap jelisi arqyly «Nur-Sultanda eki adam qaıtys boldy» jáne «Almatyda vırýs juqtyrǵan qytaı azamattary emdelip jatyr» degen shyndyqqa janaspaıtyn aqparat taraýda. Onyń bári jalǵan. О́ńirlerden de osyndaı aqparat kelip jatyr. Bizdiń negizgi mindetimiz – elimizdegi túrli aýrýdan, ınfeksııadan qorǵaý, ashyq ári tolyq aqparat berý. Qytaıda 80 myńnan astam naýqas tirkeldi. Sońǵy kúnde 0,18 paıyz qosymsha ósimmen naýqastardyń tirkelgeni belgili bolyp otyr. Biraq aýrýhanadan shyqqan azamattardyń sany 52 myńnan asty. Iаǵnı, búkil naýqastyń 65 paıyzy emdelip shyqty. О́kinishke qaraı, dúnıe júzindegi 79 memlekette 14 myńnan astam naýqas tirkeldi. Qazirgi tańda Qazaqstanda koronavırýs ınfeksııasymen naýqastanǵan adamdar tirkelmedi. Mundaı dıagnoz áli eshkimge qoıylǵan joq», dedi ol.
Sondaı-aq E.Birtanov óz sózinde 20 aqpannan bastap koronavırýs ınfeksııasy boıynsha qaýipti memleketter úsh sanatqa bólingenin atap ótti.
«Atalǵan sanattar boıynsha baqylaý jumystary júrgizilýde. «A» jáne «B» sanattary boıynsha 900-den astam azamat karantınge jatqyzyldy. Úshinshi sanattaǵy 7515 azamat baqylaýda. Túrli memleketten kelgen 8 myńǵa tarta azamat qazir Densaýlyq saqtaý mınıstrliginiń baqylaýynda. Vırýs bastalǵaly beri arnaıy Ulttyq sarapshylyq laboratorııa úsh memleketten qajetti laboratorlyq testti aldy. Qazirgi kúni 11 myń adam tekseris testileýinen ótti. Barlyq test nátıjesi jaqsy. Koronavırýs tabylmady», dedi ol.
Sonymen qatar mınıstr mektepterde oqý toqtatylmaıtynyn atap ótti.
«Biz qazir arnaıy qurylǵan komıssııa arqyly aldyn alý sharalaryn josparlap jatyrmyz. Adamdar kóp jınalatyn merekelik sharalardy shekteý – saqtyqtyń biri deýge bolady. Sebebi vırýstyń kimnen, qalaı juǵatynyna eshkim kepildik bere almaıdy. Sol sebepti barynsha saqtanǵanymyz abzal», dedi ol.
Indýstrııa jáne ınfraqurylymdyq damý vıse-mınıstri Berik Qamalıev Qazaqstanǵa keletin jolaýshylardyń tasymalyn shekteý boıynsha jańa sharalardyń engiziletinin jetkizdi.
«Osyǵan deıin habarlaǵanymyzdaı, Qazaqstan men Qytaı arasyndaǵy barlyq turaqty reıs 2020 jyldyń 3 aqpanynan bastap toqtatylǵan edi. Mahan-Eır áýe kompanııasynyń Almaty – Tegeran baǵyty boıynsha reısteri toqtatyldy. Almaty – Baký jáne Aqtaý – Baký baǵyttary boıynsha Ázerbaıjanmen arada aptasyna 15 reıs bar bolatyn. Biz Almaty – Baký reısin 5-ten 1 reıske deıin, al Aqtaý – Baký reısterin 7-den 1-ge deıin qysqarttyq», dedi B.Qamalıev.
Vıse-mınıstr bul sheshimdi Úkimet janyndaǵy vedomstvoaralyq komıssııa qabyldaǵanyn aıtyp, 1 naýryzdan bastap Nur-Sultan men Seýl arasyndaǵy áýe reısteri 9-dan 3-ke deıin azaıǵanyn alǵa tartty.
«Bul reısterdi «Air Astana» men ońtústikkoreıalyq «Asiana» áýe kompanııasy oryndap kelgen. Komıssııa sonymen birge 8 naýryzdan bastap Ońtústik Koreıanyń azamattary men 1 sanattaǵy elder azamattarynyń elge kirýin shekteý týraly sheshim qabyldady. Osyǵan baılanysty Seýl – Almaty jáne Seýl – Nur-Sultan baǵdary boıynsha saparǵa jaýapty áýe kompanııalarynyń bárine radıogramma jiberdik», dedi vıse-mınıstr.
Aıta ketetin bir jaıt, birinshi «A» sanatynda Qytaı, Iran, Ońtústik Koreıa elderi, al birinshi «B» sanatynda QHR, Gonkong, Makao, Taıvan (QHR), Japonııa, Italııa, ekinshi sanatta Fransııa, Germanııa, Taıland, Ázerbaıjan, úshinshi sanatta BAÁ, Ispanııa, Malaızııa, Irak, Shveısarııa, Ulybrıtanııa, Bahreın, Kýveıt, Sıngapýr, AQSh qatarly memleketter tur.
Densaýlyq saqtaý mınıstrligi koronavırýs ınfeksııasynyń taralýyn boldyrmaý úshin kelesi aldyn alý sharalaryn usynady. Aldymen qol men betti sabynmen jıi jáne muqııat jýý, qoldy zalalsyzdandyrýda spırtti antıseptıkterdi qoldaný, adamdar kóp jınalatyn oryndardan aýlaq bolý, naýqas adamdarmen baılanysta bolmaýǵa, sýyq tııý belgileri (joǵary temperatýra, murynnyń bitelýi, jótel, tamaqtyń aýrýy) paıda bolǵan jaǵdaıda, turǵylyqty jeri boıynsha dárigermen keńesý kerek.
