Beıbit turǵyndardyń ólimine ákelip soqtyrǵan «Musylman baýyrlar» qozǵalysy jaqtaýshylary bastaǵan jappaı tártipsizdikterinen keıin Mysyr premer-mınıstri Hazem al-Bablaýı atalmysh uıymdy taratý jóninde usynys bildirdi. Bul týraly Kaırde ótken baspasóz máslıhatynda mınıstrler kabınetiniń BAQ-pen baılanys jónindegi keńesshisi Sherıf Shoýkıdiń aqparyna silteme jasaǵan ITAR-TASS habarlady.
Sherıf Shoýkıdiń aıtýy boıynsha, qozǵalys basshylary óz jaqtaýshylarynyń memlekettik uıymdar men polısııa bólimshelerine shabýyl jasap, keńseler men shirkeýlerdi qıratyp, órteýlerine tikeleı yqpal etken. «Olar narazylyq sherý júrgizýdiń sheginen asyp, qoǵam qaýipsizdigine nuqsan keltirýde», – dedi mınıstrler kabınetiniń keńesshisi. Ol sondaı-aq úkimet basshysynyń birqatar mınıstrlerge «Musylman baýyrlar» qozǵalysyn taratýǵa baılanysty qajet zańdy negizder daıyndaýǵa tapsyrma bergenin habarlady.
Baspasóz-konferensııasy barysynda Shoýkı ótken táýlikterde Kaır men basqa da qalalarda oryn alǵan tártipsizdikter saldarynan qaza bolǵandar sany týraly Mysyr densaýlyq saqtaý mınıstrliginen alynǵan derekterdi usyndy. Onda kórsetilgendeı, 173 adam, onyń ishinde 57 tártip saqshysy qaza taýyp, 1330 azamat pen áskerı qyzmetker jaraqat alǵan.
Aıdar О́risbaev.
