Eýrazııalyq ıntegrasııa ınstıtýty men Túrkistan oblysynyń ákimdigi uıymdastyrǵan is-sharaǵa jergilikti memlekettik organdar, ÚEU ókilderi, Ulttyq qoǵamdyq senim keńesiniń músheleri, ǵalymdar, jýrnalıster men blogerler qatysty. Is-shara moderatory Ulttyq keńes múshesi, Eýrazııalyq ıntegrasııa ınstıtýtynyń dırektory Erlan Saırov elimizdiń saıası, áleýmettik jáne ekonomıkalyq aspektilerin odan ári jańǵyrtý men transformasııalaý úshin memlekettik organdar men azamattyq qoǵam arasynda tabysty dıalog qajet ekenin atap ótti. «О́ńirlerde saraptamalyq talqylaýlar ótkizý mańyzdy, óıtkeni barlyq qazaqstandyq qoǵamnyń reformalardy talqylaýǵa qatysýynsyz, jergilikti halyqtyń pikirin jáne óńirlerdiń ereksheligin eskermeı, «Halyq únine qulaq asatyn memleket» atty tujyrymdamany sapaly júzege asyrý múmkin emes», dep esepteıdi Túrkistan oblystyq Qoǵamdyq damý basqarmasy basshysynyń orynbasary Dáýren Sarıev.
«О́ńirde barlyq aýdan, qala ákimderiniń esep berý naýqany aıaqtaldy. О́tken jyldyń qorytyndysymen turǵyndar tarapynan oblys ákimdigine jer, áleýmettik, turǵyn úı-kommýnaldyq sharýashylyq jáne basqa salalarǵa qatysty 4134 ótinish kelip túsken. Atalǵan máselelerdi sheshý úshin tıisti basqarma basshylary men aýdan, qala ákimderine tapsyrma berilip, jumystar júıelendi. Oblys ákimi О́mirzaq Estaıuly men orynbasarlary 809 azamatty jeke qabyldady. Olardyń suraqtaryna der kezinde jaýap berip, qalǵan azamattarǵa zań talaptaryna sáıkes túsindirme berildi. Al basqarma tarapynan árbir ózekti aqparat pen synı maqalaǵa qatysty jyldam áreket etý algorıtmi bar. Áleýmettik jeli, BAQ betindegi árbir synı maqalalar saraptalyp, el múddesine saı jumys atqarylady. Resmı aqparat beriledi», dedi basqarma basshysynyń orynbasary. Sondaı-aq D.Sarıev memleket tarapynan óńirdiń damýyna úlken qoldaý kórsetilip jatqanyn, osy rette basqarma azamattyq qoǵam ókilderimen, erkin oıly azamattarmen birlesip jumys isteýge daıyn ekenin jetkizdi.
Jıynda sondaı-aq beıbit mıtıngiler ótkizý týraly zań jobasy, qoǵamdyq ınstıtýttardy odan ári damytý, qazaqstandyq ózin-ózi seziný jáne óńirlik kontekste eldi áleýmettik jańǵyrtýdyń ózekti máseleleri jan-jaqty talqylandy. «Serpin» Ulttyq bilim jáne ınnovasııalar palatasynyń prezıdenti, UQSK múshesi Murat Ábenov saıası júıeni jańǵyrtýǵa ǵana emes, áleýmettik máselelerdi sheshýge de nazar aýdarý qajettigin, reformalar júıeli túrde iske asyrylýy tıistigin atap ótti. Al Ulttyq keńes múshesi Aıgúl Orynbek qoǵamdy odan ári demokratııalandyrý jáne azamattardyń quqyqtaryn qorǵaý úshin «Halyq únine qulaq asatyn memleket» atty tujyrymdamany ilgeriletý qajet dep esepteıdi. «Mıtıngige shyǵýshylar da naqty talap, ustanym bolýy tıis. Qazirgi tańda olaı bolmaı tur. Jastardy quqyqtyq saýattylyqqa úıretý kerek», dedi Aıgúl Orynbek.
Ulttyq keńestiń ashyq jáne jarııaly jumys isteıtinin aıtyp ótken Erlan Saırov usynys, talap-tilekterdi áleýmettik jeli arqyly da jiberýge bolatynyn eskertti. «Bizdi halyq ta, bılik te synaıdy. Bul qoǵamdyq jumys. Bizge dáreje kerek emes. Tek ózekti máselelerdiń sheshimin tabýyna septigimizdi tıgizsek deımiz. Sonda ǵana ıgi is jasadyq dep aıta alamyz», dedi Eýrazııalyq ıntegrasııa ınstıtýtynyń dırektory. Bul oraıda Túrkistan oblystyq ardagerler keńesi tóraǵasynyń orynbasary Kenjehan Tólebaev Túrkistanda bastaý alǵan ákeler mektebin respýblıkada qurý, bastaýysh synypta ulttyq sabaqtardy oqytý qajettigi jóninde usynysyn jetkizdi. «Serpin» Ulttyq bilim jáne ınnovasııalar palatasynyń prezıdenti M.Ábenov jıynda aıtylǵan barlyq usynysty eskerýsiz qaldyrmaýǵa ýáde etti.
Túrkistan oblysy
