Uly Abaıdyń 175 jyldyǵyna oraılastyrylǵan gastroldik sapar aıasynda, ıaǵnı, naýryzdyń 12-13-i kúnderi atyraýlyq turǵyndar men qonaqtar tanymal ujymnyń ónerin tamashalaýǵa múmkindik alady.
Teatr ujymy Djordj Balanchınniń bir aktili «Serenada» baleti men «Uly dala murasy» dıvertısmenti engen tańdaýly baǵdarlamasyn tartý etpekshi.
HH ǵasyr baletiniń altyn qoryna engen «Serenada» – amerıkalyq horeograf Djordj Balanchınniń aıtýly týyndysy. 2017 jyly «Astana Balet» teatrynyń sahnasynda premerasy ótken bul týyndyny kórermen zor yqylaspen qabyldap ári mádenı sarapshylar tarapynan qubylys retinde baǵalanǵan edi. Sebebi kúlli Ortalyq Azııa aýmaǵynda Djordj Balanchın qorymen yntymaqta, horeograftyń stıli men tehnıkasynyń standarttaryn tolyq saqtaı otyryp qoıylǵan alǵashqy balet bolatyn. «Serenadany» qazaq sahnasynda qoıǵan Vıktorııa Saımon – amerıkalyq horeograftyń tól shákirti. Buǵan deıin Saımon álemniń túrli elinde Balanchınniń otyz shaqty spektaklin sahnalaǵan.
Konserttiń ekinshi bóliminde qazaq mádenıetiniń qyr-syryn áıgileıtin «Uly dala murasy» baǵdarlamasy kórsetilmek. Qazaqstannyń eńbek sińirgen qaıratkerleri Aıgúl Tátı men Mýkaram Avahrıdiń horeografııalyq mınıatıýrasy kóshpeli halyqtyń tanym kókjıegin aıǵaqtaıdy. Osy baǵdarlamaǵa engen barlyq mınıatıýralar qazirgi qazaq horeografııasyn tanýǵa múmkindik beredi. Munda etnografııa elementteri, bı dástúri men zamanaýı horeografııalyq sheshimder úılesim tapqan.
Aıta keteıik, naýryzdyń 25-26-sy kúnderi «Astana Balet» ujymy osy baǵdarlamamen Semeıdegi Abaı atyndaǵy teatrda óner kórsetpek.
