Otandyq ónimge qoldaý maqsatynda óńirdegi qurylys kompanııalary qala ataýyn ıemdengen sementti paıdalanýda. «Baǵasy qoljetimdi, sapasy jaqsy», deıdi tutynýshylar.
Jańǵyrtý prosesinen ótken bir ǵana osy mekeme emes, Shymkent munaı óńdeý zaýyty da osy jolda K4 jáne K5 ekologııalyq klastaǵy joǵary oktandy benzınd shyǵarýdy bastady.
Aldaǵy ýaqytta shahardaǵy taǵy birneshe kásiporyn túleý men túrlenýdiń jańa kezeńin bastap ketpek.
Al biz baǵasy halyqqa qoljetimdi «Shymkentsement» AQ zaýytynyń jumysyna qaıta oralaıyq.
Atalǵan kásiporyn – búginde ishki naryqty otandyq sement ónimimen qamtamasyz etip otyrǵan birden-bir óndiris orny. Zaýytta sement buryndary eski ádispen shyǵarylǵandyqtan, ekologııaǵa zııany kóp bolyp, óndiris aımaǵyna jaqyn ornalasqan turǵyndardyń narazylyǵy kúsheıe túsken. Osyny eskergen zaýyt ákimshiligi sheteldik ozyq óńdeý tehnologııasyn engizip, qurǵaq ádispen sement ala bastaǵan. «Á» degennen jańa joba kádege jarap, qorshaǵan ortaǵa tastalatyn zııandy zattardyń da kólemi azaıǵan. Esesine, sementtiń sapasy joǵarylap, qaladaǵy iri qurylys zattary dúkenderi bul taýardy satylymǵa shyǵara bastaǵan.
Zaýyt basshysy Shıshka Zbıgnevtiń kásiporynnyń óndiristegi jańa tehnologııasy týraly ózindik aıtary bar.
«Kúıdirý peshiniń ylǵal ədis tehnologııasy, negizinen, onyń energııany kóp qajet etetin jəne súzgilerdiń belsendi ortada jumys isteýine týra keletininen shyǵaryndylardy tazartýda joǵary kórsetkishterge qol jetkizýge múmkindik beretin ozyq úlgidegi tehnologııa (OÚT) retinde qarastyrylmaıdy. Sóıtip, OÚT baǵytyndaǵy ilgerileý sementti ylǵaldy ədispen óndirýden qurǵaq ədispen óndirýge ótýinen bastalady, bul óz kezeginde ekologııalyq ónimdilikti qamtamasyz etedi. «Shymkentsement» zaýyty sement óndirýdiń qoldanystaǵy ylǵal ədisi peshiniń janynan bir kúnde 3200 tonna ónim beretin jylý almastyrǵysh kúıdirý peshin salý arqyly jańa, zamanaýı jobanyń bastamashysy boldy», deıdi Shıshka Zbıgnev.
